Irakanum.am-ը սույն թվականի սեպտեմբերի 11-ին հրապարակել էր «Ովքե՞ր են ցանկանում տիրանալ Լեւոն Հայրապետյանի ունեցվածքին» վերնագրով  տեսանյութ։ Մեր հրապարակմանն արձագանքել է  Զարուհի Հայրապետյանի ներկայացուցիչ՝ փաստաբան Մակար Եղիազարյանը։ Պարզաբանումը ներկայացնում ենք ստորեւէ Սույն թվականի սեպտեմբերի 11-ին irakanum.am կայքում տեղ գտած «Ովքե՞ր են ցանկանում տիրանալ Լեւոն Հայրապետյանի ունեցվածքին» վերնագրով հրապարակման և տեսանյութի կապակցությամբ հայտնում ենք, որ դրանցում տեղ գտած մտքերն ակնհայտորեն պարունակում են զրպարտություն՝ արատավորելով լուսահոգի Լևոն Հայրապետյանի, վերջինիս հարազատ դստեր՝ Զարուհի Հայրապետյանի և Զարուհու մոր՝ Մարինա Ռոստոմյանի պատիվն ու արժանապատվությունը։ Լևոն Հայրապետյանի՝ Զարուհու հայրը լինելու հանգամանքը չի կարող որևէ ողջամիտ կասկածի տակ դրվել, քանի որ դա հաստատված է բազմաթիվ անհերքելի ապացույցներով, ինչպիսիք են Լևոն Հայրապետյանի երկու հարազատ եղբայրների և Զարուհու ԴՆԹ փորձաքննությունների արդյունքները, բազմաթիվ ազգականների վկայությունները, ընտանեկան լուսանկարները և տեսանյութերը։ Այդ փաստը գրավոր կերպով հաստատել է նույնիսկ Արցախի թեմի առաջնորդ Պարգև Արքեպիսկոպոս Մարտիրոսյանը։ Հատկանշական է, որ օրենսդրությամբ նախատեսված է հայրության ճանաչման երկու եղանակ՝ սերման փաստի հաստատմամբ և հայրության ճանաչման փաստի հաստատմամբ, որոնցից որևէ մեկի ճանաչումն արդեն իսկ բավարար է որպեսզի անձը համարվի երեխայի հայրը։ Զարուհու պարագայում երկու հիմքերն էլ միաժամանակ ապացուցված են, այսինքն՝ հաստատված է թե կենսաբանական զավակ լինելը, թե այն, որ Լևոն Հայրապետյանը Զարուհուն մշտապես ընդունել և հոգ է տարել որպես իր դուստր։ Ակնհայտ է, որոշ շահագրգիռ անձինք նմանատիպ մեթոդներով փորձում են արհեստականորեն վեճեր ստեղծել ժառանգների միջև և ձգձգել Լևոն Հայրապետյանի ժառանգության բացման գործընթացը՝ ժառանգական գույքը փոշիացնելու նպատակով, ինչը թույլ չենք տալու։ Միաժամանակ անընդունելի է զանգվածային լրատվության միջոցներով նմանատիպ հրապարակում իրականացնելն առանց մյուս կողմի կամ Լևոն Հայրապետյանի ազգականներից որևէ մեկի կարծիքը լսելու, ինչը վրդովմունք է առաջացրել վերջիններիս մոտ։ Հարցազրույց տված որոշ անձինք հայտնում են նաև, որ իրենց խոսքը ներկայացվել է կոնտեքստից կտրված տեսքով, ինչը խեղաթյուրում է նյութի բովանդակությունը։ Հորդորում ենք այսուհետ զերզ մնալ Բարերարի և վերջինիս ընտանիքի պատիվը արատավորելու, ոչ հավաստի և ուղղորդված տեղեկատվություն տարածելու փորձերից։ Մենք հետևողական ենք լինելու նմանատիպ դրսևորումներ ցուցաբերած անձանց պատասխանատվության ենթարկելու հարցում։ Ներկայացնում ենք Զարուհու հայրության ճանաչման վկայականը, ինչպես նաև Լևոնի, Զարուհու և Մարինայի մի քանի համատեղ ընտանեկան լուսանկարներ։ Մյուս ապացույցները չենք հրապարակում անձնական տվյալների գաղտնիության պահպանման նկատառումներից ելնելով։ Զարուհի Հայրապետյանի ներկայացուցիչ՝ փաստաբան Մակար Եղիազարյան