Ռուսաստանում ընթացող Ֆուտբոլի աշխարհի առաջնության խմբային փուլի երկրորդ տուրը նոր է սկսվել, սակայն կարծես արդեն ուրվագծվում են առաջնության լավագույն ռմբարկուները։ Այս առումով իրար կրկնակոխ հետեւում են Պորտուգալիայի հավաքականի առաջատար Քրիշտիանու Ռոնալդուն եւ Իսպանիայի հավաքականի հարձակվող Դիեգո Կոստան։ Այս երկու հավաքականները նույն խմբում են եւ հենց առաջին տուրում հանդիպեցին, դիտարժան ու լարված հանդիպումն ավարտվեց ոչ ոքի՝ 3։3 հաշվով։ Հենց այս խաղում այս երկու ֆուտբոլիստն աչքի ընկան։ Պորտուգալիայի հավաքականից հեթ տրիկի հեղինակ դարձավ Ռոնալդուն, Կոստան էլ 2 գնդակ խփեց։ Նախօրեին երկրորդ փուլի խաղերի ժամանակ երկու թիմն էլ հաղթանակ տարան իրենց մրցակիցների նկատմամբ 1։0 հաշվով եւ կրկին յուրաքանչյուր հավաքականից մեկական գոլի հեղինակ դարձան Ռոնալդուն եւ Կոստան։ Այսպիսով, լավագույն ռմբարկուների ցանկն այս պահին գլխավորում է Ռոնալդուն՝ 4 գնդակով։ Երկրորդը Կոստան է՝ 3 գնդակով։