Հայաստանի երեխաների առողջության հիմնադրամի ղեկավար արմեն Մարտիրոսյանը գրել է.
«Մեր հրաշքը՝ Դավիթը, ժամեր առաջ լքեց մեզ:
Անչափ դժվար էր լսել էս շատ ցավալի լուրը: Բոլորիս կողմից արվեց ահնարինը, որ Դավիթն ապրի, բայց, ցավոք, հիվանդությունն ավելի ուժեղ գտնվեց:
Ամեն երեխայի մահվան լուրը մեր թիմի համար անչափ մեծ ցավ ա, աննկարագրելի էմոցիաներ, վստահ եմ՝ բոլորիդ համար, բայց բոլորս էլ քաջ գիտակցում ենք, որ էս ամենը նույնպես կյանքի անբաժանելի մի մասն ա կազմում, ու մեծ թվով ապաքինված երեխաների կողքին նաև նման ծանր կորուստներ ենք ունենալու:
Անչափ շնորհակալ ենք հայ ու բելառուս բժիշկներին ու մեծաթիվ աջակիցներին՝ հոգատարության համար: Անսահման համբերություն եմ մաղթում ծնողներին ու հարազատներին, բոլորիս:
Աստված հոգիդ լույսերի մեջ պահի, եղբայր»:
Հիշեցնենք, որ օրերս՝ Դավիթի ծննդյան օրը, իրականացվել է սրտի փոխպատվաստումը: Վիրահատությունը լավ էր անցել, Դավիթն իրեն լավ էր զգում:
2023-ի ապրիլին Դավիթի մոտ ի հայտ եկան շնչառական խնդիրներ։ Հետազոտությունները պարզեցին, որ նրա մոտ առկա է սրտամկանի հիվանդություն՝ դիլատացիոն կարդիոմիոպաթիա՝ սրտի կծկողական ֆունկցիայի խիստ իջեցմամբ:
Դավիթը 16 տարեկան էր:
