Նարեկ Սամսոնյանին և Վազգեն Սաղաթելյանին ցանկանում են հանրային դաշտից ընդհանրապես կտրել, որ այս մարդիկ չկարողանան իրենց տեսակետը դարձնել հանրային, Երևան քաղաքի քրեական դատարանի «Ավան» նստավայրի դիմաց լրագրողների հետ զրույցում ասաց Վազգեն Սաղաթելյանի պաշտպան Արսեն Բաբայանը։
«Այս միջնորդության մեջ մեծ հաշվով հենց այդպես էլ գրված է, որ այս մարդիկ չկարողանան իրանց խոսքը, տեսակետը, կարծիքը դարձնել հանրային»,-ասաց Արսեն Բաբայանը։
Նա հույս հայտնեց, որ արդարադատություն կլինի, դատախազության միջնորդությունը կմերժվի և տղաները կշարունակեն մնալ ազատության մեջ։
Հիշեցնենք՝ Նարեկ Սամսոնյանի և Վազգեն Սաղաթելյանի դեմ քրեական գործով հանրային մեղադրողը միջնորդություն է ներկայացրել դատարան՝ նրանց նկատմամբ կիրառված «վարչական հսկողություն» խափանման միջոցը փոխելու և 3 ամիս ժամկետով կալանք կիրառելու պահանջով։
«Միջնորդության փաստական հիմքն այն է, որ ըստ դատախազի՝ Նարեկն ու Վազգենը խախտել են վարչական հսկողության պայմանները։ Պաշտպանության կողմը միջնորդության դեմ առարկում է»,-հայտնել էին փաստաբաններ Ռուբեն Մելիքյանը և Արսեն Բաբայանը։
