Վաղարշապատ խոշորացված համայնքի ղեկավար Դիանա Գասպարյանը մարդկանց պաշտոնների է նշանակում խնամի–ծանոթ– բարեկամ (ԽԾԲ) սկզբունքով։ Մասնավորապես 2022 թվականի մարտի 25–ին այդ ժամանակ Էջմիածնի մշակույթի տան տնօրեն Ալվինա Համբարձումյանը, ով ղեկավարել է կառույցը յոթ տարի ֆիզարձակուրդի է գնացել, որից երկու–երեք ամիս հետո մշակույթի տունը լուծարվում է համայնքը խոշորացնելու պատճառաբանությամբ։ Ավելի ուշ՝ սեպտեմբերին հայտարարվում է Վաղարշապատի Կոմիտիասի անվան Մշակութային պալատի տնօրենի նոր մրցույթ, որին մասնակցում է երկու հոգի՝ Ալվինա Համբարձումյանն ու վերջինիս տեղակալ՝ Հասմիկ Ադամյանը։ Նշենք, որ մրցույթի էական պահանջներից մեկն այն է, որ մասնակիցը պետք է ունենար համապատասխան բնագավառում մասնագիտական ստաժ։ Սակայն Հասմիկ Ադամյանն այն չի ունեցել, քանի որ եղել է անգլերեն լեզվի մասնագետ։ Մրցույթում միաժամանակ երկու մասնակիցն էլ հաղթել են, բայց Դիանա Գասպարյանը հայեցողական որոշմամբ տնօրեն է նշանակել Հասմիկ Ադամյանին։ Սա իհարկե ունի իր պատճառները։ Բանն այն է, որ Irakanum.am–ի տեղեկություններով Հասմիկ Ադամյանի սկեսրայրը Վաղարշապատի ավագանու ՔՊ–ական անդամ է, իսկ հայրն էլ՝ նախկին պաշտոնյա և ամուր թելերով կապված են ՔՊ–ականների հետ։
Ալվինա Համբարձումյանի ներկայացուցիչը դիմել է դատարան, սակայն Առաջին ատյանի դատարանը քաղաքապետի որոշումը թողել է ուժի մեջ, որն էլ բողոքարկվել է Վերաքննիչ քրեական դատարանում։ Այս կառույցն էլ գտել է, որ առաջին ատյանի դատարանի որոշումը ենթակա է բեկանման և պարտավորեցրել է Էջմիածնի քաղաքապետին ապացուցել որ անգլերենի մասնագետը կարող էր հավակնել մշակույթային կառույցի տնօրենի պաշտոնում։
Թե ինչպես է քաղաքապետ Դիանա Գասպարյանը ապացուցելու մի բան, որը գոյություն չունի, թերևս թողնում ենք ընթերցողների դատին, ընդամենն արձանագրելով, թե ինչպես է իբրէ խծբ–ն մերժելու խոստումով իշխանության եկած ՔՊ–ականները բոլոր տեղերում պաշտոնի նշանակում բացառապես այն մարդկանց, ովքեր կապ ունեն իրենց կուսակցության հետ։
Irakanum.am
