ՌԴ քրեական հետախուզության աշխատակիցները ձերբակալել են Կրասնոյարսկի երկրամասի Աչինսկի երկու բնակչի՝ ազգությամբ հայ բնակչի սպանության կասկածանքով, որոնցից մեկին նա գրեթե մեկ միլիոն ռուբլի պարտքով գումար է տվել։ Այս մասին տեղեկանում ենք ՌԴ Քննչական կոմիտեի մարզային շտաբից, փոխանցում է «ՌԻԱ Նովոստի»-ն։
Քննության տվյալներով՝ բռնության նշաններով տղամարդու դիակի մասին հաղորդում է ստացվել դեկտեմբերի 23-ին։ Փաստի առթիվ հարուցվել է քրեական գործ, բերման են ենթարկվել Աչինսկի 37-ամյա և 56-ամյա բնակիչները։ Նրանց մեղադրանք է առաջադրվել ՌԴ քրեական օրենսգրքի 105-րդ հոդվածով (սպանություն, որը կատարվել է մի խումբ անձանց կողմից, նախնական համաձայնությամբ, շահադիտական նպատակներով):
Ըստ քննիչների՝ մահացածը ՀՀ-ից պարբերաբար այցելել է Աչինսկ՝ բուժման նպատակով։ Նա պարտքով գումար է տվել իր 56-ամյա ընկերոջը՝ գրեթե 1 միլիոն ռուբլի։ Պարտապանը որոշել է, որ ավելի հեշտ է ազատվել պարտատիրոջից, քան վերադարձնել պարտքը։
«Ծրագիրն իրականացնելու համար, պարտքը մարելու պատրվակով տղամարդիկ նրան կանչել են ընկերոջ տուն։ Այնտեղ տղամարդկանցից մեկը վերցրել է փայտե մահակը և հարվածել նրա գլխին, որից հետո երկրորդ հարձակվողը նույնպես մի քանի անգամ հարվածել է տղամարդուն։ Ստացած վնասվածքներից նա կորցրել է գիտակցությունը»,-ասված է հաղորդագրության մեջ։
Հանցագործությունը թաքցնելու համար տղամարդու դին թաքցրել են ջրանցքում։ Նրանք այս պահին ձերբակալված են։
ՆԳՆ տարածքային շտաբից հայտնել են, որ մահացածը 75-ամյա բնակիչ է, ով մահից մի քանի ժամ առաջ պետք է մեկներ Հայաստան։ Հետախույզները պարզել են, որ մահացածը մի քանի տարի է, ինչ գալիս է Աչինսկ՝ բուժման նպատակով և այդ ընթացքում ընկերներ է ձեռք բերել, որոնց պարտքով գումար է տվել։
