ԱՄՆ նախագահ Ջո Բայդենը, մեկնաբանելով երկրում ինֆլյացիայի ռեկորդային աճի մասին աշխատանքի նախարարության զեկույցը, հայտարարել է, որ գների իջեցումը, այդ թվում՝ էներգառեսուրսների, իր քաղաքականության առաջնահերթություններից է։ Հայտարարության տեքստը չորեքշաբթի հրապարակել է Սպիտակ տան մամուլի ծառայությունը։

«Ինֆլյացիան հարվածում է ամերիկացիների գրպանին, եւ այս միտումը փոխելն ինձ համար կարեւորագույն առաջնահերթություն է»,- ասել է ամերիկացի առաջնորդը։

Նրա խոսքով, երկրում էներգառեսուրսների գների աճը այն հիմնական գործոններից մեկն է, որը հանգեցնում է ընդհանրապես ինֆլյացիայի։ «Ես հանձնարարել եմ իմ Ազգային տնտեսական խորհրդին քայլեր ձեռնարկել՝ փորձելով այս գները շատ իջեցնել»,- ասել է Բայդենը։ Նա հավելել է, որ հանձնարարել է նաեւ միջոցներ ձեռնարկել այս շուկայում ցանկացած տեսակի սպեկուլյացիայի եւ գնային մանիպուլյացիայի դեմ։