Քանի որ դելտա շտամի ավերիչ ալիքն ամբողջ աշխարհում թուլանում է, գիտնականները ենթադրել են, որ կորոնավիրուսը կարող է էնդեմիկ հիվանդություն դառնալ 2022 թվականին, հայտնում է Reuters-ը։

Նրանք կարծում են, որ առաջին երկրները, որոնք կհաղթեն կորոնավիրուսին, կլինեն պատվաստումների ամենաբարձր ցուցանիշ ունեցող երկրները՝ Միացյալ Նահանգները, Միացյալ Թագավորությունը, Պորտուգալիան և Հնդկաստանը։

Այնուամենայնիվ, նրանց կարծիքով, SARS-CoV-2-ը դեռևս անկանխատեսելի վիրուս է, որը կարող է հետագայում մուտացիայի ենթարկվել։

«Ոչ մի գիտնական լիովին չի բացառում այն, ինչ ոմանք անվանում են «դատաստանի օրվա սցենար», որի դեպքում վիրուսը կարող է այնպիսի մուտացիայի ենթարկվել, որ իմունային համակարգը չկարողանա հաղթահարել այն», — ասել է հետազոտողներից մեկը հարցազրույցում:

Առողջապահության համաշխարհային կազմակերպության համաճարակաբան Մարիա վան Կերխովը նշել է, որ կորոնավիրուսը կհաղթահարվի մինչև 2022 թվականի վերջը։ Նա ասել է, որ մահվան դեպքերը կտրուկ կնվազեն հիվանդության վերահսկումից հետո:

Նա նաև հավելել է, որ COVID-19-ի հետ կապված իրավիճակը կարող է վերահսկվել միայն այն դեպքում, եթե պատվաստված լինի աշխարհի բնակչության 70%-ը։