Amazon-ի հիմնադիր Ջեֆ Բեզոսը խոստացել է 2 միլիարդ դոլար հատկացնել բնությունը վերականգնելու համար, հայտնում է BBC-ն։

Բեզոսի «Երկրի հիմնադրամ»-ից փողերը կուղղվեն լանդշաֆտների վերականգնմանը եւ պարենային համակարգերի վերափոխմանը, հայտարարել է նա Գլազգոյում COP26 կլիմայական համաժողովի ժամանակ: Հիմնադրամը նախատեսում է 10 միլիարդ դոլար ծախսել ընդհանրապես կլիմայի փոփոխության դեմ պայքարի համար։

«Աշխարհի շատ մասերում բնությունն արդեն ածխածնի կլանողից դառնում է ածխածնի աղբյուր»,- ասել է նա:

Գլազգոյում աշխարհի ամենամեծ առցանց մանրածախ առեւտրի հիմնադիրը հուլիսին իր New Shepard հրթիռային նավի ճանապարհորդությունը նկարագրել է որպես Երկրի խոցելիության բացահայտում: «Ինձ ասացին, որ Երկրի տեսքը տիեզերքից փոխում է այն օբյեկտիվը, որով դուք նայում եք աշխարհին, բայց ես պատրաստ չէի, թե որքանով է դա ճիշտ: Այնտեղից Երկրին նայելով՝ մթնոլորտն այնքան բարակ է թվում, աշխարհը՝ այնքան փխրուն: Սա վճռորոշ տասնամյակ է, մենք բոլորս պետք է համախմբվենք, որպեսզի պաշտպանենք մեր աշխարհը»։

Սեպտեմբերին Բեզոսի «Երկրի հիմնադրամը» խոստացել էր 1 միլիարդ դոլար հատկացնել բնության, բնիկ ժողովուրդների եւ մշակույթների պահպանման համար:

Երեքշաբթի օրը, հայտարարելով 2 միլիարդ դոլարի խոստման մասին, Բեզոսն ասել է, որ Աֆրիկայի բերրի հողերի երկու երրորդը դեգրադացվել է, բայց դա կարելի է կասեցնել: «Վերականգնումը կարող է բարելավել հողի բերրիությունը, բարձրացնել բերքատվությունը եւ բարելավել պարենային անվտանգությունը, ջուրն ավելի հուսալի դարձնել, աշխատատեղեր ստեղծել եւ արագացնել տնտեսական աճը ու ածխածնի որսը»,- ասել է նա: