2017թ.-ի մայիսի 3-ին Երևանի «Էրեբունի» ԲԿ-ում Հայաստանի համար աննախադեպ ծնունդ էր գրանցվել` 23-ամյա Լուսինե Պողոսյանը կեսարյան հատման միջոցով լույս աշխարհ էր բերել հինգ երեխա, գրում է Aysor.am-ը Հնգյակի 1 տղան ու 4 աղջիկները ծայրահեղ անհաս էին: Օրեր շարունակբժիշկները պայքարում էին երեխաների կյանքի ու առողջության համար, իսկ հասարակությունը, լրատվամիջոցները Լուսինեի ու նրա ամուսին` 24-ամյա Վարդան Կարապետյանի հետ միասին հետևում իրավիճակին: Հնարավոր եղավ փրկել հնգյակից միայն մի երեխային` Ռոզիին: Այսօր Ռոզին դարձավ 1 տարեկան: Ռոզի Վարդան Կարապետյանն ասում է` Ռոզին իրենց ընտանիքի երջանկությունն է ու այն ուժը, որ օգնեց հաղթահարել մյուս 4 երեխաների կորուստը: «Ինձ այդպես էլ կհիշեն որպես հնգյակի հայր, լինում է, որ փողոցում ճանաչում են, մոտենում», - Aysor.am-ին պատմում է Վարդանը: Փրկված աղջկան Ռոզի են անվանել Վարդանի մոր` Ռոզայի անունով: Այսօր, ըստ հայրիկի, երեխան չունի ոչ մի առողջական խնդիր. «Առողջական առումով ամեն ինչ նորմալ է: Արդեն իր բնավորության գծերն էլ են նկատվում ու մի գիծն ակնհայտ է` շատ աշխույժ է», - ժպտում է Վարդանը: Հնգյակի ծնունդից հետո երիտասարդ ընտանիքին օգնելու ցանկություն հայտնեցին բազմաթիվ կառույցներ ու քաղաքացիներ: Լրատվամիջոցներում տեղեկություն հայտնվեց, որ ընտանիքը մինչ այդ ապրել է հանրակացարանային պայմաններում: Արդյունքում Մայր Աթոռից, խոստման համաձայն, ընտանիքին նվիրեցին 4 սենյականոց բնակարան Մեծամոր քաղաքում, որտեղ էլ հիմա ապրում են: «Նաև այդ օրերին մի քաղաքացի իմ հաշվեհամարին 140 հազար դրամ փոխանցեց` անանուն էր, չգիտեմ էլ ով էր, բայց շատ շնորհակալ ենք: Պետությունն էլ արեց ամեն բան, ինչ նախատեսվում էր», - ասում է Վարդանը: Հիմա նա ունի կայուն աշխատանք` նույն տեղում, ինչ և հայտնի հնգյակի հայրիկ դառնալուց առաջ: «Այդ օրերին աշխատանքների շատ առաջարկներ եղան ինձ, բայց արդյունքում, երբ աղմուկն անցավ, ոչ մի կոնկրետ բան չեղավ, մնացի իմ նախկին աշխատանքին, բայց գոհ եմ», - ասում է: Մյուս 4 երեխաների կորուստն ընտանիքը դեռ փորձում է հաղթահարել, բայց ինչպես Վարդանն է ասում` հասկանում են, որ պիտի հաշվի նստեն իրականության հետ. «Իրականության հետ պետք է հաշվի նստես: Չես կարող անդընդհատ ասել` ինչի՞ այսպես եղավ... Շատ ցավալի էր, շատ, բայց երևի Ռոզիին ունենք ու ինքը մեր երջանկության աղբյուրն է», - ասում է: Մանրամասն՝ սկզբնաղբյուր կայքում