«Իրատես» թերթը գրում է. «Սահմանադրական դատարանի որոշ դատավորներին մի կերպ պաշտոնանկ արած իշխանություններն այժմ էլ մի կերպ դատավորներ են փորձում ընտրել: Մինչեւ առաջադրված թեկնածուները խորհրդարանի դատին կներկայացվեն, նրանցից մեկի մասին, օրինակ, Կոռուպցիայի կանխարգելման հանձնաժողովը խիստ անակնկալ եզրա- կացություն է տվել դատավորների ընդհանուր ժողովի կողմից ՍԴ դատավորի թեկնածու առաջադրված Երվանդ Խունդկարյանի գործունեության մասին: Ըստ մամուլի հրապարակումներից մեկի՝ «Հայաստանը Խունդկարյանի կայացրած դատական որոշումների պատճառով ֆինանսական լուրջ խնդիրների առաջ է կանգնել: Բանն այն է, որ Մարդու իրավունքների եվրոպական դատարանը Հայաստանին մեծ գումարներ է պարտադրել վճարել այն վճիռների մասով, որոնց զգալի մասը քննվել է Խունդկարյանի կողմից»: Կոռուպցիայի կանխարգելման հանձնաժողովի նախագահ Հայկուհի Հարությունյանը «Իրատեսի» հետ զրույցում հաստատեց՝ եզրակացություն հանձնաժողովը տվել է, սակայն դրա բովանդակությունը բարձրաձայնելու կամ մանրամասնելու իրավունք չունի: «Ձեր հարցադրումներն անգամ օրենքի խախտում են, ու եթե ինչ-որ մեկը մանրամասնություններ է հրապարակել, ապա կարող է ընդհուպ քրեական պատասխանատվության կանչվել»,- ասաց Հայկուհի Հարությունյանը: Մեր տեղեկություններով՝ իշխանությունն ամենաբարձր մակարդակով անում է հնարավորը, որպեսզի կոռուպցիայի կանխարգելման հանձնաժողովի տված եզրակացության մասին հասարակությունն առհասարակ չիմանա, Խունդկարյանն էլ անարգել կարգվի նախ դատավոր, իսկ այնուհետ` ՍԴ նախագահ: Թե պատգամավորներն ինչպես եւ ում ՍԴ դատավոր կընտրեն, խիստ անկանխատեսելի է, բայց հետեւելով դատարանի շուրջ ընթացող իրադարձություններին, հասկանում ենք՝ ՍԴ մասով ճգնաժամ իշխանության ներսում կա»: Առավել մանրամասն՝ թերթի այսօրվա համարում