Մամուլը գրում է՝ «Իմ քայլում» հակասությունները սրվում են. ԱԺ առողջապահության հանձնաժողովի նախագահ Նարեկ Զեյնալյանի և Արսեն Թորոսյանի հակամարտությունը հին է՝ դեռ ժամանակին փոխվարչապետ Արարատ Միրզոյանն էր ուզում, որ Արա Մինասյանի փոխարեն «Գր. Լուսավորիչ» ԲԿ տնօրեն նշանակվի իր սանիկը` Նարեկ Զեյնալյանը, սակայն Թորոսյանը նշանակեց իր մարդուն: Օրերս Մաշկաբանության և սեռավարակաբանության կենտրոնին վերաբերող օրինագծի քննարկման ընթացքում այս հակասությունն ավելի տեսանելի դարձավ։ Օրենսդիր թույլ չտվեց, որ կենտրոնը մասնավորեցվի․ մամուլում շրջանառվող լուրերի համաձայն՝ դա եղավ նաև Զեյնալյանի ակտիվ ջանքերով։ Մամուլը գրում է՝ Արսեն Թորոսյանը ցանկանում է, որ կենտրոնը մասնավորեցվի։ Նրա մտերիմ՝ «Մեդլայն կլինիկ» ԲԿ տնօրեն Բաբկեն Շահումյանը հեռանկարային ծրագրեր ունի այս հաստատության հետ կապված, ավելին նախարարը խոստացել է, որ առաջիկայում էլի կփորձի մասնավորեցնել կենտրոնը, իսկ եթե չստացվի, կփոխի պրոֆիլը և տնօրենին, կկրճատի բյուջեն։ irakanum.am-ի թղթակցի հետ զրույցում առողջապահության նախարարի մամուլի խոսնակը նշեց՝ Արսեն Թորոսյանը, ԱՆ-ն լիազորություն չունեն զբաղվել մասնավորեցման հարցով․ աւյնպես ար, այդ լուրն իրականությանը չի համապատասխանում։ «Մասնավորեցման հետ կապված՝ որոշում կայացնողն Ազգային ժողովն է, և նախարարն այդ գործընթացի հետ կապ չունի, ինքը չի իրականացնում», — ասաց Ալինա Նիկողոսյանը։ Նա վստահեցրեց՝ Նարեկ Զեյնալյանի և Արսեն Թորոսյանի «հակամարտության» հետ կապված լուրերը անհիմն են։ «Ես, իսկապես, չգիտեմ, թե այդ լուրերը գրելիս իրենք ինչի վրա են հիմնվել։ Այդ հակասությունների մասին տեղեկությունները ենթադրությունների վրա հիմնված տեղեկություններ են», — եզրափակեց Ալինա Նիկողոսյանը։