Հունվարի 2-ին, ժամը 05.10-ին, ոստիկանության Երեւան քաղաքի վարչության օպերատիվ կառավարման կենտրոնից ոստիկանության Կենտրոնական բաժնում հաղորդում է ստացվել, որ իրենց է զանգահարած անհայտ քաղաքացին եւ հայտնել, որ Հյուսիսային պողոտայում կռիվ է: Նույն օրը, ժամը 05.50-ին, ոստիկանության բաժնում հաղորդում է ստացվել հիվանդանոցից: Կրծքավանդակի եւ որովայնի կտրած-ծակած վերքերով բուժօգնության է տեղափոխվել 40-ամյա Կարեն Դ.-ն եւ 39-ամյա Միքայել Ա.-ն՝ ձեռքի մատի կոտրվածքով: Ոստիկանության քրեական հետախույզների ու Երեւան քաղաքի վարչության ՊՊԾ գնդի 3-րդ՝ հատուկ եւ 1-ին գումարտակների ծառայողների ձեռնարկված համատեղ միջոցառումների շնորհիվ պարզվել է, որ նույն օրը, ժամը 04.30-ին, Հյուսիսային պողոտայի բարերից մեկում՝ 29-ամյա Մհեր Մ.-ն, 20-ամյա Արթուր Ե.-ն, 40-ամյա Կարեն Դ.-ն եւ 39-ամյա Միքայել Ա.-ն վիճել են, այնուհետեւ վիճաբանությունը շարունակվել է դրսում: Հյուսիսային պողոտայի շենքերից մեկի դիմաց ծեծկռտուքի ընթացքում Միքայել Ա.-ն ստացել է վնասվածք, իսկ Մհեր Մ.-ն դանակով հարվածել է Կարեն Դ.-ին: Ձեռնարկվում են միջոցառումներ Մհեր Մ.-ին եւ Արթուր Ե.-ին հայտնաբերելու ուղղությամբ: Դեպքի առթիվ հարուցվել է քրեական գործ՝ ՀՀ քրեական օրենսգրքի 112 հոդվածի 1-ին մասի՝ դիտավորությամբ առողջությանը ծանր վնաս պատճառելու հատկանիշով: Կատարվում է նախաքննություն: