Դեկտեմբերի 23-ին, ժամը 21-ի սահմաններում ոստիկանության Նոր Նորքի բաժնում հաղորդում է ստացվել, որ Ավանի 14-րդ փողոցի տներից մեկի վրա մի մարդ ինքնաձիգով կրակում է: Մեկնած օպերատիվ խումբը դեպքի վայրում հայտնաբերել է 12 մմ տրամաչափի երկփողանի որսորդական հրացանի 20 պարկուճ եւ արնանման հետքեր: Կրակոցի հետքեր են հայտնաբերվել տներից մեկի դարպասին, լուսամուտին, պատշգամբին: Տեղում պարզվել է, որ նույն օրը, ժամը 21.15-ին, նշված տան մոտ, 32-ամյա Վահրամ Մանվելյանն իրեն ամրակցված «MR 43» տիպի որսորդական հրացանից կրակել է իր ազգականի տան ուղղությամբ, հայհոյել: Հարեւաններից 68-ամյա Հենրիկ Ն.-ն դիտողություն է արել Վ. Մանվելյանին, նա էլ դիտավորությամբ նշված հրացանից կրակել է Հենրիկ Ն.-ի ոտքերին, որը ժամը 22.00-ին «զույգ ստորին վերջույթների բազմաբեկոր հրազենային վնասվածք» ախտորոշմամբ տեղափոխվել է հիվանդանոց: Ժամը 21.45-ին Վահրամ Մանվելյանը դեպքի վայրից բերման է ենթարկվել, որի ընթացքում ոտքով հարվածել եւ դիտավորությամբ կոտրել է ՊՊԾ թիվ 29 պարեկային ավտոմեքենայի դռան ապակին: Հանցագործության գործիք հրացանն առգրավված է: Վահրամ Մանվելյանը ձերբակալվել է: Նշանակվել են ԴԲՓ, դատաձգաբանական, դատաքիմիական եւ դատակենսաբանական փորձաքննություններ: Կատարվում է նախաքննություն: