Հուլիսի 5-ին վարչապետ Նիկոլ Փաշինյանն այցելել էր Սյունիքի մարզի Մեղրու բժշկական կենտրոն, ծանոթացել հաստատության պայմաններին, մատուցվող ծառայություններին և առկա խնդիրներին:
Բժշկական կենտրոնի տնօրեն Լուսինե Վարդանյանը ներկայացրել է կազմակերպության հնարավորությունները և կարևորել ռենտգեն ժապավենների թվայնացման անհրաժեշտությունը, ինչը հնարավորություն կընձեռի բոլոր խնդրահարույց դեպքերը քննարկել հանրապետության այլ մասնագետների հետ, որը կնպաստի ծառայությունների մատուցման որակի բարելավմանը:
Բարձրացված հարցի առնչությամբ վարչապետը հանձնարարել է գտնել լուծում, ինչի կապակցությամբ առողջապահության նախարարի մոտ կազմակերպվել են քննարկումներ:
Օգոստոսի 25-ին առողջապահության նախարար Արսեն Թորոսյանի և ԱՆ առողջապահական ծրագրերի իրականացման գրասենյակի տնօրեն Հայկ Սայադյանի Մեղրու բժշկական կենտրոն այցի ժամանակ, տեղում ուսումնասիրելով պահանջարկը, որոշում է ընդունվել կազմակերպությանը ռենտգեն ժապավենների սկաներ տրամադրելու վերաբերյալ:
Սարքը ձեռք բերելու վերաբերյալ բանակցություններ են տարվել Համաշխարհային բանկի հետ: Արդյունքում այն գնվել է Համաշխարհային բանկի կողմից ֆինանսավորվող «Հիվանդությունների կանխարգելում և վերահսկում» ծրագրի շրջանակներում և նոյեմբերի 10-ին հատկացվել Մեղրու բժշկական կենտրոնին:
Կենտրոնն արդեն իսկ կիրառում է սկաները, և թվայնացված պատկերներն ուղարկվում են համապատասխան մասնագետների դիտարկմանը:
00:00:00
