ՀՀ վարչապետի նստավայրում հոկտեմբերի 23-ին կայացավ «ՏՏ ոլորտում ՀՀ պետական կրթական մրցանակ»-ին արժանացած լավագույն ուսանողների և աշակերտների պարգևատրման հանդիսավոր արարողությունը: Մրցանակներն ու պատվոգրերը հանձնեց ՀՀ վարչապետ Նիկոլ Փաշինյանը: «Այս ոլորտը պետք է դառնա մեր գիտարար տնտեսության կարևոր հենասյուներից մեկը: Դա պայմանավորված է մեր երկրի՝ ժամանակակից աշխարհի հետ համաքայլ գնալու անհրաժեշտությամբ: Այստեղ գտնվող մրցանակակիրները կյանքի ինչ-որ փուլում որոշում են կայացրել զբաղվել իրենցով, քանի որ հենց ինքը մարդն է իր հաջողության գրավականը: Նոր Հայաստանում յուրաքանչյուրն ինքն է որոշում իր աշխատասիրությամբ, իր ջանքերով, իր մղումով իր տիեզերքի չափը»,- նշեց Նիկոլ Փաշինյանը: Այս տարի «ՏՏ ոլորտում ՀՀ պետական կրթական մրցանակ»-ին արժանացավ 25 ուսանող և 18 աշակերտ: «Լավագույն աշակերտ» մրցանակին արժանացած 13-ամյա Ռուբեն Սարգսյանն, ով սովորում է Գյումրու «Ֆոտոն» վարժարանում, մտադրություն ունի արհեստական բանականությամբ ռոբոտ ստեղծել: «Մասնակցել եմ հարցազրույցի, որտեղ հիմնականում տվել են ընդհանուր զարգացվածությունը ստուգող հարցեր՝ ավելի շատ կենտրոնանալով ֆիզիկամաթեմատիկական գիտությունների վրա: Ստուգել են վերլուծական մտածողությունը, տրամաբանությունը, և այդպիսով՝ պատասխանելով հարցերին, արժանացել եմ «Լավագույն աշակերտ» մրցանակին»,- ընդգծեց Ռուբենը: Վերջինս ընդգծեց, որ իր ստեղծած ռոբոտը պետք է կարողանա օգնել մարդկանց առօրյա մի շարք հարցերում: Նախկինում Ռուբենը ստեղծել է սեփական խաղ, որտեղ կան արհեստական բանականության մասնիկներ՝ օբյեկտն ինքն է որոշում, թե ինչ քայլ պետք է անի՝ կախված իր առջև դրված խնդիրներից: Գլխավոր մրցանակի համար սահմանված է 1200 ԱՄՆ դոլարին համարժեք ՀՀ դրամ, «լավագույն ասպիրանտ» անվանակարգի առաջին կարգի մրցանակը կկազմի 1000 ԱՄՆ դոլարին համարժեք ՀՀ դրամ, իսկ երկրորդ կարգի դեպքում՝ 750 ԱՄՆ դոլարին համարժեք ՀՀ դրամ: «Լավագույն մագիստրանտ»՝ առաջին կարգ՝ 750 ԱՄՆ դոլարին համարժեք ՀՀ դրամ, իսկ երկրորդ կարի համար 500 ԱՄՆ դոլարին համարժեք ՀՀ դրամ: «Լավագույն բակալավր» անվանակարգում առաջին կարգի մրցանակը սահմանվել է 500 ԱՄՆ դոլարին համարժեք ՀՀ դրամ, իսկ երկրորդ կարգի մրցանակը՝ 400 ԱՄՆ դոլարին համարժեք ՀՀ դրամ: «Լավագույն սփյուռքահայ ուսանող» մրցանակի առաջին կարգին արժանացած անձը արժանացավ 750 ԱՄՆ դոլարին համարժեք ՀՀ դրամ, իսկ երկրորդը՝ 500 ԱՄՆ դոլարին համարժեք ՀՀ դրամ: «Լավագույն աշակերտ» անվանակարգի համար սահմանվել է 100 ԱՄՆ դոլարին համարժեք ՀՀ դրամ: «Լավագույն ասպիրանտ», «Լավագույն մագիստրանտ», «Լավագույն բակալավր» և «Լավագույն աշակերտ» անվանակարգերում մրցանակները նախատեսված են յուրաքանչյուր կրթական հաստատության համար: Արդեն 14-րդ անգամ անցկացվող մրցանակաբաշխությանն այս մրցանակին մինչ օրս արժանացել է 489 ուսանող և աշակերտ: