«Նապոլիի» գլխավոր մարզիչ Կառլո Անչելոտին հայտարարել է, որ նրան ուրախացրել է հարձակվող Կրիշտիանու Ռոնալդուի տեղափոխությունն Իտալիա: Վերջինս միաժամանակ կատակել է՝ նշելով, որ պորտուգալացին չպետք է տեղափոխվեր «Յուվենտուս»: «Կրիշտիանուի տեղափոխությունը հրաշալի է Ա Սերիայի համար: Ա Սերիան երկար ժամանակ համարվել է գերաստղերի առաջնություն: Ժամանակին այստեղ են հանդես եկել Մարադոնան, Պլատինին, Զիկոն, Զիդանը, Ռոնալդուն, Շևչենկոն, Կական և Իբրահիմովիչը: Վերջին 10 տարվա ընթացքում ամեն ինչ չէր, որ այդպես էր, սակայն Ռոնալդուն կարող է վերադարձնել անցյալը: Նա հրաշալի պրոֆեսիոնալ է: Սակայն նրա միակ սխալն այն էր, որ նա տեղափոխվել է «Յուվենտուս»»,- Անչելոտիի խոսքն է մեջբերում Football Italia-ն: Հիշեցնենք, որ 33-ամյա Ռոնալդուն «Յուվենտուս» է տեղափոխվել «Ռեալից» 100 մլն եվրոյի դիմաց: Ընթացիկ մրցաշրջանում հարձակվողը մասնակցել է 10 հանդիպման, դարձել 5 գոլի և 5 գոլային փոխանցման հեղինակ: