ՀՀ քննչական կոմիտեի Երեւան քաղաքի քննչական վարչության Ավան եւ Նոր Նորք վարչական շրջանների քննչական բաժնում քննվող քրեական գործով ձեռնարկված անհետաձգելի միջոցառումների արդյունքում բացահայտվել է Ավանում դեղատան աշխատակցի նկատմամբ կատարված ավազակային հարձակումը։

ՀՀ Քննչական կոմիտեից հայտնում են, որ 2018թ-ի հոկտեմբերի 13-ին ահազանգ էր ստացվել առ այն, որ նույն օրը՝ ժամը 16:20-ի սահմաններում, զինված անձը մուտք է գործել Երեւան քաղաքի Ավան վարչական շրջանում գործող դեղատուն, որտեղ դեղագործի կյանքի ու առողջության համար վտանգավոր բռնություն գործադրելու սպառնալիքով պահանջել է գումար։ Հափշտակելով 15.100 ՀՀ դրամ կանխիկ գումար՝ զինված անձը դիմել է փախուստի:

Դեպքի առթիվ ՀՀ ՔԿ ԵՔՔՎ Ավան եւ Նոր Նորք վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 175-րդ հոդվածի 2-րդ մասի 4-րդ կետով եւ 235-րդ հոդվածի 1-ին մասով, մշակվել քննչական պլան, եւ ձեռնարկվել մեծածավալ քննչական եւ օպերատիվ-հետախուզական միջոցառումներ՝ հանցագործությունը բացահայտելու ուղղությամբ։

Դեղագործը ճանաչվել է տուժող եւ հարցաքննվել։ Քրեական գործով տվյալներ են ձեռք բերվել առերեւույթ հանցագործություն կատարած անձի արտաքին տվյալների վերաբերյալ եւ անհրաժեշտ օպերատիվ-հետախուզական միջոցառումներ իրականացնելու մասին  հանձնարարություն տրվել ոստիկանության Նոր Նորքի բաժնի ծառայողներին:

14.10.2018թ. վարույթն իրականացնող մարմնին է ներկայացվել կասկածյալը, ով Երեւանի բնակիչ է, ծնված՝1997 թվականին:

Վերջինիս անձնական խուզարկությամբ հայտնաբերվել է 4 գրամ քաշով դեղնականաչավուն զանգված, դանակ, 5.000 ՀՀ դրամի մետաղադրամների կապոց, որը, քննության տվյալներով, հափշտակվել էր դեղատնից:

Կասկածյալը ձերբակալվել է եւ հարցաքննվել դեպքի շուրջ, նրա մասնակցությամբ կատարվել  դեպքի վայրի զննություն:

Նույն օրը՝ 14.10.2018թ., կասկածյալի եղբայրը ներկայացրել է նաեւ MP-654K մոդելի T12049377 համարի ատրճանակը, որը, ըստ հայտարարության, դեպքի օրը գտնվել է 21-ամյա երիտասարդի մոտ։

Նախաքննությունը շարունակվում է, քրեական գործով էական նշանակություն ունեցող մի շարք հանգամանքներ պարզելու համար նշանակվել են դատաքիմիական, դատաքրեագիտական փորձաքննություններ: