Երևանի նորընտիր քաղաքապետ Հայկ Մարությանն ընդգծում է, որ ինքը ստանձնել է Երևանի քաղաքապետի պաշտոնը, քանի որ այդպես են որոշել Երևանի բնակիչները: Երևանի քաղաքապետարանում քաղաքապետի երդման արարողությունից հետո ունեցած ելույթում Հայկ Մարությանն ընդգծեց, որ հայ ժողովուրդը որոշումներ կայացնելու որոշումը վաստակել է իր իսկ կողմից իրականացված թավշյա հեղափոխության շնորհիվ:
Նրա խոսքով` ավագանու ընտրությունների ժամանակ Երևանի բնակիչները իրացրեցին իրենց իրավունքը, կայացրեցին իրենց որոշումն ու ավագանու 65 անդամներին պատվիրակեցին քաղաքապետարան: «Հուզմունքս մեծ է, պատասխանատվութան զգացումս` հսկայական: Սա մեր Երևանն է հրաշք քաղաք, հրաշք պատմությամբ, ճարտարապետությամբ և մարդկանցով»,-ասաց Մարությանը:
Նա վստահեցրեց, որ մեկ առ մեկ հիշում է այն հանձնարարությունները, որ տալիս էին Երևանի բնակիչները նախընտրական քարոզարշավի ժամանակ: «Վերականգնել Երևանը, մաքրել, կանաչապատել այն, դարձնել հասանելի ամեն մի վայր, գործել արդարության սկզբունքով; Ուզում եմ վստահեցնել ձեզ, որ հենց այդպես էլ լինելու , որովհետև իր քաղաքը, կամ երկիրը սիրող մարդն այլ կերպ չի կարող վարվել»,-ասաց նա՝ հավելելով, որ սիրում ու խենթանում է Երևանի համար: Հայկ Մարությանը շնորհակալություն հայտնեց երևանցիներին վստահության համար:
«Ես համաձայն եմ ամեն բառի հետ, որ հնչեց իմ երդման ժամանակ: Սա իրական երդում էր ձեր և Աստծո առաջ»,-հավելեց Երևանի քաղաքապետը:
00:00:00
