«Կուտակային կենսաթոշակների համակարգի» մասին ՀՀ օրենքում լրացումներ կատարելու մասին օրենքի նախագիծը 78 կողմ, 2 դեմ և 6 ձեռնպահ ձայների հարաբերակցությամբ այսօր խորհրդարանն ընդունեց առաջին ընթերցմամբ։ Սա, հիշեցնենք, այն նախագիծն է, որը երբ ներկայացնում էին նախկին իշխանությունները, այն ժամանակ ընդդիմադիր ԱԺ «Ելք», «Ծառուկյան» և Դաշնակցություն խմբակցությունները դեմ էին արտահայտվում։ Մինչդեռ այսօր, երբ նույն խմբակցությունները ներկայացնող քաղաքական ուժերի ներկայացուցիչները կառավարության կազմում են, նախագիծն արդեն ընդունելի է նրանց համար։ Մինչև քվեարկությունը վարման կարգով ելույթ ունենալով՝ ԱԺ «Ծառուկյան» խմբակցության պատգամավոր Նաիրա Զոհրաբյանըհայտարարեց, որ այսօր ներկայացված նախագիծը որոշակիորեն մեղմում է ֆինանսական բեռը։ «Քննարկելով մեր գործընկերների հետ՝ մենք կքվեարկենք կողմ՝ պայմանով, որ կառավարության հետ կշարունակենք քննարկումները պարտադիր կուտակային բաղադրիչը հանելու համար», - հայտարարեց Զոհրաբյանը։ «Ելք» խմբակցության պատգամավոր Էդմոն Մարուքյանը հայտարարեց, որ այսօր ստեղծված իրավիճակն այնպիսին է, որ հրատապ քայլ պետք է արվի, որից հետո քննարկումներըր շարունակվելու են։ «Պարտադիր կուտակայինի էջը փակված չէ, այդ իսկ պատճառով, քանի որ կա բարելավում, մենք կողմ ենք քվեարկելու», -հայտարարեց Մարությանը։ Դաշնակցության դիրքորշումը, իհարկե, որոշակիորեն տարբերվող էր. նրանց խմբակցության բոլոր անդամները ձեռնպահ էին։ «Մեր սկզբունքային դիրքորշումը հայտնել ենք՝ մենք այս նախագծին ձեռնպահ ենք քվեարկելու, որովհետև պարունակում է նախկինի հետ համեմատ բարելավում, բայց չի լուծում կարևորագույն հարցը՝ այն է պարտադիր բաղադրիչի վերացման հարցը։ Այն առաջացնում է լուրջ խնդիր, խաթարում է անձի սեփականության իրավունքը և ստիպում է այսօրվա սոցիալական հարցերը չլուծած, գումար թողնել հետագայի համար», - իրենց դիրքորոշումը ներկայացրեց Դաշնակցություն խմբակցության ղեկավար Արմեն Ռուստամյանը։ Սա Հանրապետական կուսակցության ղեկավարած նախկին կառավարության նախաձեռնությունն էր և այդ պատճառով էլ ՀՀԿ խմբակցությունը կողմ քվեարկեց առաջարկվող փոփոխություններին։