Հունիսի 24-ին Նիկոսիայի նախագահական պալատում Ն.Ս.Օ.Տ.Տ. Արամ Ա Մեծի Տանն Կիլիկիո կաթողիկոսը «Կիլիկյան Իշխան» շքանշանով է պարգևատրել Կիպրոսի Հանրապետության նախագահ Նիկոս Խրիստոդուլիդիսին։
Պարգևատրման հանդիսությանը ներկա են եղել Լիբանանից և Կիպրոսից ժամանած պետական, եկեղեցական և համայնքային ներկայացուցիչներ։
Իր խոսքում Արամ Ա կաթողիկոսը բարձր է գնահատել Կիպրոսի հավասարակշռված և խաղաղարար դերակատարությունը տարածաշրջանային բարդ իրավիճակներում՝ ընդգծելով նաև հայ և կիպրացի ժողովուրդների դարավոր կապերը, ընդհանուր արժեքները և արդարության ու մարդու իրավունքների պաշտպանության հարցում ունեցած հանձնառությունը։
Վեհափառ Հայրապետը հատուկ շնորհակալություն է հայտնել Կիպրոսի նախագահին, կառավարությանը և կիպրացի ժողովրդին՝ կիպրահայ համայնքի նկատմամբ ցուցաբերած եղբայրական և աջակցող վերաբերմունքի համար։
Նախագահ Նիկոս Խրիստոդուլիդիսը շնորհակալություն է հայտնել բարձր պարգևի համար՝ նշելով, որ տարբեր պետական պաշտոններ զբաղեցնելու ընթացքում մշտապես առանձնահատուկ սեր և հոգածություն է ցուցաբերել Հայաստանի և հայ ժողովրդի նկատմամբ։ Նա անդրադարձել է նաև Կիլիկիայի հայկական թագավորության և Կիպրոսի պատմական կապերին։
Պարգևատրման արարողությունից հետո Կիպրոսի նախագահը Վեհափառ Հայրապետի պատվին ճաշկերույթ է կազմակերպել նախագահական պալատում, որի ընթացքում քննարկվել են Մերձավոր Արևելքին, Լիբանանին և Հայաստանին առնչվող հարցեր։
