Հանրապետության հրապարակում մեկնարկել է «Քաղաքացու օրվա նվիրված» «Խաղաղության ձայնը» խորագրով համերգը, որի ընթացքում նախատեսված է նաև «Վարչաբենդի» ելույթը։
Բեմում են լինելու նաև Իվետա Մուկուչյանը, Outlandish-ը, In-Grid-ը, Ուիլլի Ուիլյամը և Իմանին (Նադիա Մլաջաո)։
Հիշեցնենք, որ Քաղաքացու օրվան նվիրված «Խաղաղության ձայնը» խորագրով փառատոնը ֆինանսավորվել է Ֆասթ բանկի կողմից, որը պատկանում է Վիգեն Բադալյանին՝ առավել հայտնի «Վիվարոյի Վիգեն» անվամբ։ «Դոմինո փրոդաքշն»-ից «Փաստինֆո»-ին հայտնել են, որ փառատոնն ամբողջությամբ իրականացվում է հովանավորների միջոցներով, պետական բյուջեից որևէ գումար չի տրամադրվել։
«Հովանավորների տրամադրած գումարի մասին տեղեկություն տրամադրելը փոքր-ինչ կոմերցիոն գաղտնիք է, չենք կարող հայտնել։ Պետական բյուջեից բացարձակ հատկացում չկա։ Հովանավորը Ֆասթ բանկն է, բոլոր բաններների վրա գրված է, միայն բանկն է»,- նշել են «Դոմինո փրոդաքշն»-ից։
Ինչ վերաբերում է համաշխարհային արտիստների ընտրությանը, ապա հայտնել են, որ նրանց հետ բավականին երկար ժամանակ՝ շուրջ մեկ տարուց ավելի, բանակցություններ են ընթացել։
