Գերմանիայի կանցլեր Ֆրիդրիխ Մերցը հայտարարել է, որ Եվրոպան չպետք է բանակցություններ սկսի Ռուսաստանի հետ, քանի դեռ Կրեմլը պատերազմի խաղաղ լուծում փնտրելու իրական ցանկություն չի ցուցաբերում։ Նա նման հայտարարություն է արել Մյունխենի անվտանգության համաժողովում, հաղորդում է Եվրոպական խորհրդարանը։
Պատասխանելով համաժողովի նախագահ Վոլֆգանգ Իշինգերի հարցին՝ Ռուսաստանի հետ բանակցություններում Եվրոպայի դերի մասին, Մերցը շեշտել է, որ եվրոպական մայրաքաղաքները «սերտ կապի մեջ են նրանց հետ, ովքեր խոսում են ռուսական կողմի հետ, լինի դա ԱՄՆ-ը, թե Ուկրաինան» և լավ տեղեկացված են քննարկումների բովանդակության մասին։
«Երկրորդ... Կար մեկ ԵՄ վարչապետ (Հունգարիայի վարչապետ Վիկտոր Օրբան - խմբ.), որը Մոսկվա էր գնացել սեփական նախաձեռնությամբ։ Դա գրեթե երկու տարի առաջ էր։ Նա մանդատ չուներ։ Նա այնտեղ գնաց և ոչնչի չհասավ։ Եվ մեկ շաբաթ անց մենք տեսանք քաղաքացիական ենթակառուցվածքների, տների և հիվանդանոցների վրա ավերիչ հարձակումներ, ինչպես երբեք»,- հիշեցրել է կանցլերը։
Մերցը պարզաբանել է, որ բանակցություններն իմաստ ունեն միայն այն դեպքում, եթե Ռուսաստանը պատրաստ է դրանց։
«Իմ անձնական կարծիքով՝ այս պատերազմը կավարտվի միայն այն ժամանակ, երբ Ռուսաստանը տնտեսապես, քաղաքականապես և ռազմականապես սպառված կլինի»։ Մենք մոտենում ենք այդ պահին, և ես արդեն նշել եմ, որ մենք շատ բան ենք արել դրան հասնելու համար, սակայն դա դեռ չի եղել... Մենք պետք է անենք ամեն ինչ, որպեսզի նրանց հասցնենք այն կետին, որ նրանք այլևս չտեսնեն այս պատերազմը շարունակելու իմաստը»,- հավելել է Մերցը՝ ընդգծելով, որ դա պետք է իրականացվի Ամերիկայի, Եվրոպայի և Ուկրաինայի համատեղ ջանքերով։
Հունվարին Ֆրանսիայի նախագահ Էմանուել Մակրոնը հայտարարեց, որ եվրոպացիները պետք է վերսկսեն Պուտինի հետ ուղիղ բանակցությունները, եթե ԱՄՆ ջանքերը Ուկրաինայում խաղաղ կարգավորման միջնորդության համար ձախողվեն։ Փետրվարի 3-ին Մակրոնը հայտարարեց, որ եվրոպական երկրների և Ռուսաստանի միջև երկխոսության վերսկսման նախապատրաստական աշխատանքներն ընթանում են տեխնիկական մակարդակով, իսկ փետրվարի 10-ին նա հայտարարեց, որ նման բանակցություններն արդեն սկսվել են։
