Օգոստոսին Հայաստանը հիմնականում գտնվելու է հարավից ներթափանցող տաք օդային հոսանքների ազդեցության գոտում, ինչի արդյունքում ամսական միջին ջերմաստիճանն ամբողջ ամսվա ընթացքում կանխատեսվել է կլիմայական նորմայից բարձր 2-3 աստիճանով, տեղումների քանակը՝ նորմայից պակաս, այսօր հայտարարեց Հիդրոօդերևութաբանության և մոնիտորինգի կենտրոնի տնօրենի տեղակալ Գագիկ Սուրենյանը։
Օգոստոսի ամենաբարձր ջերմաստիճանները կգրանցվեն առաջին տասնօրյակում։ Մայրաքաղաքում ջերմաչափի սյունը կհասնի +42 աստիճանի։
«Ազգաբնակչությանը կոչ ենք անում պահպանել հրդեհավտանգության կանոնները՝ անտառային հրդեհներից խուսափելու համար։ Գետնին մի՛ գցեք այրված լուցկի կամ ծխախոտի մնացորդներ, մի՛ նետեք ապակյա տարաներ, որովհետև այն կատարում է ոսպնյակի դեր և ստեղծում հրդեհ, մի՛ թողեք տարածքում դյուրավառ նյութերով լցված տարաներ կամ դրանցով թրջված լաթեր։ Անտառային լանդշաֆտում մի՛ վառեք կրակ, իսկ եթե վառել եք, տարածքը լքելուց առաջ համոզված եղեք, որ այն ամբողջապես մարել է»,- կոչ արեց Սուրենյանը։
