Տրոլեյբուսների և 171 նոր ավտոբուսների պայմանագրերի կնքման փուլում ենք, որոնք մեր տրանսպորտային ցանցի կարևոր մաս պետք է դառնան, Երևանի քաղաքապետարանի գործակարգավորական նիստի ընթացքում այս մասին ասաց քաղաքապետ Տիգրան Ավինյանը։
«Շատ կարևոր է նաև 18 մետրանոց ավտոբուսների հետագա գնումը, որովհետև 2025թ. լրանում է HIGER մակնիշի ավտոբուսների օգտագործման ժամկետը:
HIGER մակնիշի ավտոբուսները նույնպես պետք է փոխարինվեն, շատ լավ են ծառայել այդ ավտոբուսները, բայց արդեն բարոյապես մաշված են, պարկի կեսն արդեն չկա: Ունենք խնդիր մասնավոր գծերի հետ կապված, որոնց ընդհանուր շարժակազմը ևս հին է, դրանք էլ ունեն փոխարինման կարիք:
250 հատ 18 մետրանոց ավտոբուսներով ամբողջովին փակում ենք տրանսպորտային ցանցի պահանջարկը»,-ասաց Ավինյանը։
Նա նշեց, որ այս տարի մի քանի կարևոր ուղղություններով ավտոբուսների առանձնացված գծեր կսահմանվեն:
«Առանձնացված գծերի հայտնվելը Երևանում էապես կրճատելու է մարդկանց տեղաշարժի ժամանակը: Սա ապացուցված փաստ է, իհարկե, անհատ վարորդների համար որոշակի անհարմարություններ են առաջանալու, բայց այն մարդիկ, ովքեր օգտվելու են հանրային տրանսպորտից, էականորեն ավելի կարճ ժամկետում են մի կետից մյուսը տեղափոխվելու։ Պետք է քննարկում՝ հասկանալու, թե ավտոբուսային առանձնացված գծերով ինչ այլ տրանսպորտային տեսակներ կարող են երթևեկել։ Ենթադրում եմ՝ այդտեղ կարող են լինել հեծանիվները, մոպեդները, միգուցե, մոտոցիկլետները, գուցե, ինչ-որ մի փուլում՝ երևանյան տաքսին, բայց տաքսու համար հստակ նոր պահանջներ դնելով»,-հայտարարեց Տիգրան Ավինյանը։
