ՀՀ փոխվարչապետ Մհեր Գրիգորյանը վստահ է, որ Հայաստանը գործողությունների կդիմի Մոսկվայում ձերբակալված, ապա ազատ արձակված ադրբեջանցի մարդասպանի հարցով։
«Վստահ եմ, որ գործողություններ կլինեն, բայց հիմա չեմ ուզում ավելի մանրամասն խոսել»,- լրագրողների հետ զրույցում ասաց նա։
Փոխվարչապետի խոսքով՝ հարցի հետ կապված կոլեգիալ քննարկում պետք է լինի։
«Բերեք առաջ չընկնենք, երբ կլինի պաշտոնական արձագանք՝ կխոսենք»,- նշեց նա։
Հիշեցնենք՝ Հայաստանի պահանջով Մոսկվայում ձերբակալված ադրբեջանցի մարզիչ Քանիլ Զեյնալլին ազատ է արձակվել Ադրբեջանի կառավարության ջանքերով։ Ըստ ադրբեջանական աղբյուրների՝ նա կվերադառնա Բաքու։
Վերջինիս նկատմամբ սպանության մեղադրանքով միջպետական հետախուզում է հայտարարված։
Նշենք, որ ադրբեջանցի բլոգերը, ով 2020 թվականին Արցախում հայի էր գլխատել, դա լուսանկարել և տարածել իր սոցցանցերում, բերման էր ենթարկվել «Դոմոդեդովո» օդանավակայանից։
Նա 2020թ հուլիսին իր հայրենակիցներին կոչ էր արել հարձակվել հայերի վրա Մոսկվայում և այլ վայրերում։