Վարչապետ Նիկոլ Փաշինյանը վստահեցնում է՝ բանակի մարտունակության վերաբերյալ քննարկումներ եղել են։
«Ես, ներառալ 2020 թվականի օգոստոսը, ստացել եմ հավաստիացում, որ շատ դժվար է լինելու, բայց Զինված ուժերը, Պաշտպանության բանակն իրենց առջև դրված խնդիրը կատարելու են», - 44-օրյա պատերազմի հանգամանքներն ուսումնասիրող քննիչ հանձնաժողովում այսօր հայտարարեց Նիկոլ Փաշինյանը։
Նա ասաց, թե 2018 թվականից հետո ինքը որդեգրել է «ամեն ինչ բանակի համար» քաղաքականությունը. 2019-ին էական բարձրացել են բանակում աշխատավարձերը, իրականացվել են սպառազինության ու ռազմական տեխնիկայի գնումներ։
«Շատ է խոսվում այն մասին, թե իմ վարչապետ դառնալուց հետո սպառազինության ու ռազմական տեխնիկայի ձեռքբերման պլանները փոխվել են, ձևախեղվել են. ոչ մի բան չի փոխվել, պարզապես լրացուցիչ այլ տեխնիկա է ձեռք բերվել», - նշեց վարչապետը։
Փաշինյանն ընդգծեց՝ բացառված է, որ մեկը հիշի դեպք, երբ բանակը կառավարության առաջ դրել է ինչ-որ խնդիր ու այդ խնդիրը չի լուծվել այն պատճառով, որ փող չկա։
«Բայց, ուզում եմ նաև հասկանանք, որ շատ խնդիրների լուծում միայն փողի հետ կապված չէ»,- նշեց նա։
Նիկոլ Փաշինյանը հավաստիացրեց, որ արտաքին քաղաքական վեկտորի փոփոխության հարց չի քննարկվել, որովհետև ընկալումը եղել է այն, որ արտաքին քաղաքական վեկտորի փոփոխությունը կարող է շատ ծանր հետևանքներ ունենալ Լեռնային Ղարաբաղի հակամարտության համատեքստում։
