Երևանի Կարեն Դեմիրճյանի անվան մարզահամերգային համալիրում շարունակվող ծանրամարտի Եվրոպայի առաջնության մրցումային 8-րդ օրը Հայաստանի ներկայացուցիչ Գարիկ Կարապետյանը (102 կգ) նվաճեց չեմպիոնի տիտղոսը:
Հայ ծանրորդը գրանցեց երկամարտի 392 կգ արդյունք:
Պոկում վարժությունում Գարիկը երրորդ մոտեցմամբ գլխավերևում պահեց 178 կգ ծանրաձողը՝ սահմանելով Եվրոպայի երիտասարդական ռեկորդ:
Հրում վարժությունում Կարապետյանը երկրորդ մոտեցմամբ բարձրացրեց 214 կգ-ը, իսկ երրորդ մոտեցումը չկատարեց:
Վրաստանի ներկայացուցիչ Իրակլի Չխեիձեն երկամարտի 387 կգ արդյունքով դարձավ արծաթե մեդալակիր: Լավագույն եռյակը եզրափակեց մոլդովացի Բրատու Տուդորը:
