Վարչապետ Նիկոլ Փաշինյանը պնդում է՝ Մադրիդյան սկզբունքներով Հայաստանը ճանաչել է Ղարաբաղը որպես Ադրբեջանի մաս:
«Մենք, չառերեսվելով այս իրականության հետ, զուգահեռ իրականություն ենք ստեղծել, ցանկալի իրականություն, որը միջազգային ու աշխարհաքաղաքական իրականության հետ ոչ մի կապ չի ունեցել: Ես ասում եմ՝ մենք պետք է առերեսվենք այս իրականության հետ», - Ազգային ժողովում հայտարարեց վարչապետը:
Նա կարծում է, որ նույն սխալն են գործել թե՛ ինքը, թե՛ ընդդիմադիրները. իրականության հետ չեն առերեսվել:
Վարչապետը կոչ է անում անդրադառնալ ֆունդամենտալ պրոբլեմներին, իսկ դրանք, ըստ նրա, այն են, որ բանակցային իրականությունը մի բան է եղել, եկել, տեսախցիկների առաջ ուրիշ բան են խոսել:
«Ես 2018 թվականից փորձել եմ այնպես անել, որ բանակցային սենյակներում խոսակցությունն ու հրապարակային խոսակցությունը լինի նույնը, դա եմ փորձում անել, ինչը շատ ցավոտ ու բարդ պրոցես է», - նշեց Նիկոլ Փաշինյանը:
