Ադրբեջանական կողմը դեռ չի վերադարձրել Սյունիքի մարզի Տեղ համայնքի հովվի՝ Սուրիկ Մաթևոսյանի ոչխարներին։ «Փաստինֆո»-ի հետ զրույցի ժամանակ Տեղի համայնքապետ Դավիթ Ղուլունցն ասաց, որ ոչխարներին վերադարձնելու ուղղությամբ բանակցությունները դեռ ընթանում են։ Նշենք, որ ադրբեջանցիները հունվարի 13-ին առևանգել էին Տեղ համայնքի հովիվին և տարել նրա ամբողջ հոտը, որը համայնքապետի խոսքով բաղկացած էր մի քանի հարյուր ոչխարից։ Հարցին՝ արդյոք հովիվին փոխհատուցում կտրվի, եթե ոչխարները չվերադարձվեն, Դավիթ Ղուլունցը հորդորեց «եթե»-ով չխոսել։ «Տեսնենք չեն վերադարձնում, նոր այդ մասին կմտածենք։ Իհարկե հովիվին փոխհատուցում կտրվի, բայց հավանականությունը մեծ է, որ ոչխարներին կվերադարձնեն»,-ասաց համայնքապետը։ Հարցին, թե մինչ այս պահը համայնքում գյուղացիներին փոխհատուցում տրվե՞լ է իրենց հողատարածքների և անասունների կորստի համար, Դավիթ Ղուլունցը նշեց, որ հողատարածքի կորստի համար փոխհատուցում տրամադրելու գործընթացն արդեն ընթացքում է։ «Հողատարածքների կորստի համար փոխհատուցում տալիս է պետությունը՝ 1 հա-ի համար 200 հազար դրամ։ Արդեն մեկ շաբաթ է, ինչ գրությունն ուղարկել են, մենք էլ սեփականության վկայականներն ենք ուղարկել մարզպետարան, որ փոխհատուցում տան ժողովրդին»,-ասաց համայնքապետը։ Դիտարկմանը՝ արդյոք այդ գումարը բավարա՞ր է այն մարդկանց համար, որոնք այդ հողատարածքից շարունակական եկամուտ են ստացել, Դավիթ Ղուլունցը համաձայնեց՝ գումարը բավարար չէ, բայց ամեն դեպքում մի կերպ փորձում է աջակցել ժողովրդին մինչև սահմանազատման գործընթացն իրականացվի։ Դավիթ Ղուլունցը չկարողացավ հստակ նշել, թե քանի գլուխ անասուն է այս ընթացքում անցել հակառակորդի սահմանը, սակայն ասաց, որ հապատասխան գրությունն ուղարկել են մարզպետարան և մարդիկ իրենց կորցրած անասունների համար ևս փոխհատուցում կստանան։ Դավիթ Ղուլունցի խոսքով համայնքում հատուկենտ մարդիկ են, որ անասուններին վարկով են վերցրել, և մինչ այժմ որևէ հարց չի եղել, որ համայնքապետարանը կամ մարզպետարանը գյուղացիների վարկերը մարելու հետ կապված բանկերին դիմի։