Ուկրաինայի նախկին նախագահ Պյոտր Պորոշենկոն Ուկրաինայի նախագահ Վլադիմիր Զելենսկու իշխանության հակառակորդներին կոչ է արել միավորվել։ Այդ մասին նա հայտարարել է՝ երկուշաբթի Կիևի օդանավակայանի մոտ իր կողմնակիցների հետ հանդիպման ժամանակ: Նա արտասահմանից վերադարձել է Ուկրաինա, որտեղ իրեն մեղադրում են պետական դավաճանության համար։ «Մենք այստեղ չենք Պորոշենկոյին պաշտպանելու համար, մենք այստեղ ենք միավորվելու և Ուկրաինային պաշտպանելու համար», - ասել է նախկին նախագահը։ Նա նշել է, որ իրեն աջակցում է ոչ միայն իր «Եվրոպական համերաշխություն» կուսակցությունը, այլ նաև այլ քաղաքական ուժեր, որոնք դեմ են Ուկրաինայի ներկայիս իշխանությանը։ «Շատ կարևոր է, որ մեզ հետ լինեն այլ քաղաքական դեմոկրատական ուժերի ներկայացուցիչները, որն այժմ մեր միավորման խորհրդանիշն է, քանի որ հիմա մենք պետք է համախմբվենք և ցույց տանք, որ միասնական Ուկրաինան ուժեղ է», - ընդգծել է Պորոշենկոն՝ հավելելով, որ «ուժեղ Ուկրաինան» կարող է «հակազդել» Ռուսաստանին: Պորոշենկոն իր ելույթում խոստացել է, որ արժանի պատիժը կկրեն երկրի գործող իշխանության ներկայացուցիչները։ Դրանց թվում նա դասել է ոչ միայն նախագահ Զելենսկին, այլև գործարար Իգոր Կոլոմոյսկուն, որին Պորոշենկոն իր հակառակորդն է համարում և մեղադրում է Ուկրաինայի ներկայիս ղեկավարի վրա ազդելու համար։ Պորոշենկոյի կողմնակիցներն առավոտից հավաքվել են Կիևի Պեչերսկի շրջանային դատարանի մոտ, որտեղ նրա նկատմամբ պետական դավաճանության գործով խափանման միջոց է ընտրվելու։ Ինչպես հաղորդում է ՏԱՍՍ-ի թղթակիցը դեպքի վայրից, մարդիկ շարունակում են հավաքվել: Ուկրաինայի գլխավոր դատախազությունը խնդրում է Պորոշենկոյին ձերբակալել՝ 1 միլիարդ գրիվնա (մոտ 37 միլիոն դոլար) գրավի դիմաց։ Երկուշաբթի առավոտյան Պորոշենկոն Վարշավայից մեկնել է Կիև։ Թռիչքից առաջ նա լրագրողներին ասել է, որ չի վախենում ձերբակալությունից, որը կարող էր սպասել տուն հասնելուն պես։ Երկուշաբթի նախատեսված է Կիևի Պեչերսկի շրջանային դատարանի նիստը՝ նրա ձերբակալման միջնորդությունը քննարկելու համար։ Նույն դատարանը հունվարի 6-ին կալանավորել էր նախկին նախագահի ունեցվածքը։ Նախկին նախագահը մեղադրյալ է 2014-2015 թվականներին Դոնբասից ածուխ մատակարարելու քրեական գործով։ Գործը հարուցվել է Ուկրաինայի Քրեական օրենսգրքի «Ահաբեկչության ֆինանսավորում», «Պետական դավաճանություն» և «Ահաբեկչական կազմակերպության ստեղծում» հոդվածներով։ Պորոշենկոյին սպառնում է մինչև 15 տարվա ազատազրկում՝ գույքի բռնագրավմամբ կամ առանց դրա։ 2021 թվականի դեկտեմբերին քննիչները փորձել են նրան ծանուցագիր հանձնել, սակայն նախկին նախագահը անտեսել է դա և նույն օրը մեկնել Թուրքիա։ Պորոշենկոյի կուսակցությունը հայտնել է, որ իրենց առաջնորդը «նախապես ծրագրված դիվանագիտական շրջագայությամբ մեկնել է Թուրքիա և Լեհաստան»։