Զինվորներն ու ոստիկանները սկսել են պարեկությունը Սալվադորի մայրաքաղաքի փողոցներում մի շարք սպանություններից հետո։Սպանությունների շարքի հետեւանքով երկու օրում մոտ 30 մարդ է զոհվել, փոխանցում է AP-ը։

Սալվադորում սպանությունների թիվը կտրուկ նվազել է 2010-ականների համեմատ, երբ Կենտրոնական Ամերիկայի այս 6,5 միլիոնանոց երկրում օրական 15 կամ 20 սպանությունը սովորական էր դարձել։

Նախագահ Նայիբ Բուքելեն հրամայել է զորքերին դուրս գալ Սան Սալվադորի փողոցներ՝ օգտագործելով զրահամեքենաներ՝ արգելափակելու որոշ աղքատ թաղամասերից ելքերը, մինչդեռ ոստիկանությունը դռնեդուռ էր գնում՝ փնտրելով երկրի տխրահռչակ փողոցային ավազակախմբերի անդամներին: «Մենք գիտենք, որ կան մութ ուժեր, որոնք ցանկանում են մեզ հետ տանել անցյալ, բայց այս վարչակազմը դա թույլ չի տա»,-ասել է Բուքելեն։

Մինչ այս շաբաթ Սալվադորում օրական միջինը 3,8 սպանություն է տեղի ունեցել։ Մինչ Բուքելեի՝ իշխանության գալը՝ 2018 թվականին, օրական միջինը 9,2 սպանություն էր տեղի ունենում։