Մենք ունենք Հայաստանում լարված համաճարակային իրավիճակ, բոլորը հավասար կերպով պետք է ենթարկվեն օրենքի պահանջին։ Այս մասին լրագրողների հետ ճեպազրույցում ասաց Առողջապահության նախարար Անահիտ Ավանեսյանը՝ անդրադառնալով դիմակների կրման պահանջին։ Ինչ վերաբերում է սանավիացիայի օգտագործմանը՝ Սյունիքի մարզ մեկնելու համար, նա նշեց, որ գործուղվել է Սյունիք և եթե հետագայում էլ անհրաժեշտություն լինի մասնագիտական թիմի հետ շտապ հեռավոր մարզ մեկնելու, ապա օգտագործվելու են բոլոր միջոցները։ Խոսելով չպատվաստվածների համար գազի և էլէկտրաէներգիայի վարձավճարը բարձրացնելու  լուրերի մասին՝ Անահիտ Ավանեսյանն ասաց՝ տեղյակ չէ, թե որտեղից են այդ լուրերը։

«Մահճակալային ֆոնդը շարունակում է լինել գերլարված, ծանրաբեռնված, ազատ տեղեր չունենք, ունենք սպասող քաղաքացիներ, մի փոքր այդ թիվը նվազել է։ Մինչև 200 քաղաքացի սպասում են հոսպիտալացման։ 3100 մահճակալները անընդհատ ամբողջ ծավալով օգտագործվում են։ Այս լարված վիճակի լուծումը, միակ միջոցը օր առաջ պատվաստումների ցուցանիշի բարձրացումն է»,-ասաց նա և նշեց, որ կարևոր է նաև դիմակների կրումը։ Առողջապահության նախարարն ասաց, որ երեխաների պատվաստվելու հնարավորությունը ստեղծված է, և ծնողների գրավոր թույլտվությամբ 12 տարեկանից բարձր երեխաները կարող են պատվաստվել: Նա նշոց՝  արդեն մոտ 50 երեխա պատվաստվել է։ Նախարարը հայտնեց, որ պատվաստվանյութերի խնդիրներ չկան, QR կոդերը ԵՄ երկրների համար ճանաչելի են։ «Հղիների շրջանում պատվաստման ցուցանիշը շատ ցածր է և, ցավոք սրտի, որոշ անձիք , մասնագետ էլ չեմ ուզում ասել, շատ մեծ դեր խաղացին վախեցնելու, ապատեղեկատվություն տարածելու հարցում՝ զերծ պահելով հղիներին պատվաստումից»,-ասաց նա։