Կորոնավիրուսով վարակման դեպքերը ռեկորդային ցուցանիշի են հասել Եվրոպայի շատ քաղաքներում ձմռանն ընդառաջ: Ինչպես հաղորդում է Reuters գործակալությունը, Առողջապահության համաշխարհային կազմակերպությունը նոր ալիքը բնութագրել է որպես «լուրջ մտահոգության առիթ»:

Վիրուսի տարածման դեպքերը, որոնք հատկապես շատ են Արևելյան Եվրոպայում, քննարկումների տեղիք են տվել, թե արդյոք պետք է վերսկսել տեղաշարժման սահմանափակումները Սուրբծննդյան տոներին ընդառաջ: Բացի այդ, քննարկվում է հարցը, թե ինչպես կարելի է համոզել մարդկանց պատվաստվել:

Միևնույն ժամանակ նշվում է, որ ասիական երկրները, բացառությամբ՝ Չինաստանի, վերաբացում են իրենց զբոսաշրջային հատվածը աշխարհի մյուս երկրների համար:

«Կորոնավիրուսի տարածումը Եվրոպայի տարածաշրջանի 53 երկրում լուրջ մտահոգության տեղիք է տալիս»,- հայտարարել է ԱՀԿ տարածաշրջանային բյուրոյի ղեկավար Հանս Կլյուգեն՝ հավելելով, որ թվերի աճը պայմանավորված է «Դելտա» հիմնամանրէի արագ տարածմամբ:

Անցյալ շաբաթ կորոնավիրուսով վարակման ցուցանիշը Եվրոպայում ավելացել է 6 տոկոսով՝ մոտ 1.8 մլն նոր դեպքի գրանցմամբ: Մահվան ելքով դեպքերի թիվն աճել է 12 տոկոսով: