Դեկտեմբերի 5-ին Արմավիրում սպասվող ՏԻՄ ընտրություններում միակ առաջադրված ուժ «Քաղաքացիական պայմանագիր» կուսակցության քարոզարշավի ծրագրերում ոչինչ չի փոխի։ Այս մասին NEWS.am-ի հետ զրույցում ասաց Արմավիրի քաղաքապետ, «Քաղաքացիական պայմանագիր» կուսակցության Արմավիրի քաղաքապետի թեկնածու Դավիթ Խուդաթյանը։

«Պատրաստվում ենք քարոզարշավ անել Արմավիր քաղաքում և արդեն խոշորոցված համայնքում, որին ևս 10 համայնք է միացել։ Հանդիպումներ ենք պլանավորում այնպես, ինչպես կանեինք խիստ մրցակցային պայմաններում։ Մեր պլաններում ոչինչ չի փոխվել, շարժվելու ենք նույն ուղղությամբ, որովհետև բնակիչների հետ հանդիպումները օգտակար են ցանկացած համայնքի ղեկավարի համար»,- նշեց Դավիթ Խուդաթյանը։

Խուդաթյանն ասաց, որ չի կարող ասել, թե ինչու է Արմավիրում միայն ինքն առաջադրված։

«Հույս ունեմ՝ ընդունելի թեկնածու եմ նաև ընդդիմության համար, այդ պատճառով թեկնածու չեն առաջադրել։ Եթե ընդունելի չլինեի, թեկնածու կառաջադրեին։ Երեք տարվա աշխատանքը միտված է եղել նաև նրան, որ ընդունելի թեկնածու լինեմ նաև ընդդիմության համար, որովհետև համայնքի ղեկավարը և իշխանականների և ընդդիմադիրների համայնքի ղեկավարն է ու այս փաստը կարծում եմ՝ պարտավորեցնող է»,- հավելեց Դավիթ Խուդաթյանը։

Նշենք, որ դեկտեմբերի 5-ին ՏԻՄ ընտրություններ են անցկացվելու նաև Արմավիր խոշորացված համայնքում։ Առաջադրված միակ թեկնածուն քաղաքի գործող քաղաքապետ, «Քաղաքացիական պայմանագիր» կուսակցության անդամ Դավիթ Խուդաթյանն է։