Արատավոր շրջանակը, որը կապում է բնական պաշարների սպառումը բռնի հակամարտությունների հետ, հնարավոր է աշխարհի որոշ մասերում անցել է անդառնալի կետը եւ, ամենայն հավանականությամբ, կսրվի կլիմայի փոփոխությունից, գրում է Reuters-ը: Ըստ Տնտեսագիտության եւ խաղաղության ինստիտուտի (IEP) վերլուծական կենտրոնի՝ սննդի անվտանգության բացակայությունը, ջրի անբավարարությունը եւ տարերային աղետների հետեւանքները, որոնք զուգորդվում են բնակչության բարձր աճով, հակամարտություններ են բորբոքում եւ մարդկանց տեղափոխում են խոցելի տարածքներ: IEP-ն իր «Բնապահպանական սպառնալիքների ռեեստր»-ում օգտագործում է ՄԱԿ-ի եւ այլ աղբյուրների տվյալները, որպեսզի կանխատեսի այն երկրներն ու տարածաշրջանները, որոնք առավել վտանգված են: Եվրոպայի, Մերձավոր Արեւելքի եւ Հյուսիսային Աֆրիկայի IEP-ի գծով տնօրեն Սերժ Ստրոբանցը ասել է, որ զեկույցում 30 երկիր, որտեղ 1,26 միլիարդ մարդ է ապրում, առավել վտանգված են: Վերլուծությունը հիմնված է ռեսուրսների անբավարարության եւ բնական աղետների հինգ չափանիշների վրա, ներառյալ ջրհեղեղները, երաշտները եւ ջերմաստիճանի բարձրացումը: «Մեզ նույնիսկ կլիմայի փոփոխություն պետք չէ` համակարգի պոտենցիալ փլուզումը տեսնելու համար, միայն շրջակա միջավայրի այս ութ սպառնալիքների ազդեցությունը կարող է հանգեցնել դրան, իհարկե՝ կլիմայի փոփոխությունը ուժգնացնում է այն»,- ասել է Ստրոբանցը։ Զեկույցում Աֆղանստանը ստացել է ամենավատ գնահատականը, որում ասվում է, որ շարունակվող հակամարտությունը խաթարել է ջրի եւ սննդի մատակարարման, կլիմայի փոփոխության եւ ջրհեղեղների ու երաշտների հերթագայության դեմ պայքարելու նրա կարողությունները: Ըստ եզրակացությունների՝ հակամարտությունն իր հերթին հանգեցնում է ռեսուրսների հետագա դեգրադացիայի: Անցյալ տարի կառավարությունների, ռազմական հաստատությունների եւ զարգացման խմբերի մասնակցությամբ անցկացված վեց սեմինարները ցույց են տվել, որ «դժվար թե միջազգային հանրությունը կոտրի արատավոր շրջանակը աշխարհի որոշ մասերում»,- ասել է IEP-ը: Մասնավորապես, դա վերաբերում է Սահելին եւ Աֆրիկայի եղջյուրին, որտեղ վերջին տասնամյակում նկատվում է հակամարտությունների աճ եւ սրում, ասվում է զեկույցում: «Հաշվի առնելով, որ լարվածությունն արդեն աճում է, կարելի է միայն սպասել, որ կլիմայի փոփոխությունը կարող է սրել այս մարտահրավերներից շատերը»,- ասվում է զեկույցում: