ՄԻՊ ներկայացուցիչները լսել են լրագրողների մտահոգությունները ԱԺ-ում աշխատանքի սահմանափակումների վերաբերյալ

Այսօր մի շարք լրատվամիջոցների ներկայցուցիչներ հանդիպել են Մարդու իրավունքների պաշտպանի օգնական Տաթիկ Մանուկյանի և ՄԻՊ Հանրային կապերի բաժնի պետ Նունե Հովսեփյանի հետ։

ԶԼՄ ներկայացուցիչները իրենց մտահոգությունն են ներկայացրել ԱԺ-ում տեղաշարժի, աշխատանքի սահմանափակումների հետ կապված, ինչպես նաև անվտանգության աշխատակիցների կողմից լրագրողների նկատմամբ ուժի կիրառման առնչությամբ։ ԶԼՄ ներկայացուցիչները անընդունելի են համարել սահմանափակումներին վերաբերող թե՛ ԱԺ նախագահի որոշումը և թե՛ ԱԺ նախագահ Ալեն Սիմոնյանի և պատգամավոր Սիսակ Գաբրիելյանի կողմից հեղինակված և օգոստոսի 18 -ին ԱԺ խորհրդի կողմից ընդունված նախագիծը, ըստ որի՝ լրագրողներն իրենց մասնագիտական գործունեությունը կիրականացնեն Ազգային ժողովի նստավայրում առանձնացված հատուկ տեղերում՝ նիստերի դահլիճի դիմաց գտնվող սրահում, օթյակում և Ազգային ժողովի այգում։

Լրագրողների դիտարկամբ՝ այս կերպ փորձում են ճնշել ազատ խոսքը, հանրությանը մատուցել սահմանափակ, վերահսկելի տեղեկատվություն, այս քայլով հրաժարվում են օրենսդիրի աշխատանքի թափանցիկությունից և հաշվետվողականությունից։ ՄԻՊ ներկայացուցիչները հավաքագրել են խնդիրները՝ դրանք ՄԻՊ Արման Թաթոյանին ներկայցնելու համար։ Նշենք, որ ՄԻՊ-ը Ազգային ժողովում լրատվամիջոցների ներկայացուցիչների տեղաշարժի, նրանց նկատմամբ իրականացված բռնության վերաբերյալ վերջին օրերին 3 անգամ հայտարարություն է տարածել։