Թբիլիսիի` կորոնավիրուսով վարակված բնակչուհին մահացել է կեսարյան հատումից հետո: Ինչպես հաղորդում է Новости-Грузия-ն, միջադեպը տեղի է ունեցել Առաջին համալսարանական հիվանդանոցում հուլիսի 17-ին: Հիվանդանոցի տնօրենի խոսքով` կինը, որի տարիքը մինչև 30-ի սահմանում էր, բուժհաստատություն է ընդունվել հղիության 36-րդ շաբաթում` բարդացած շնչառությամբ և կորոնավիրուսով պայմանավորված այլ բարդացումներով: Ելնելով կնոջ վիճակի բարդությունից` բժիշկները որոշել են կեսարյան հատում իրականացնել: Վիրահատությունից հետո կնոջ մոտ նաև սեպսիս է (արյան վարակում) զարգացել, որից հետո նա մահացել է: Նորածնին հաջողվել է փրկել: Տղայի վիճակը կայուն է: Նա գտնվում է վերակենդանացման բաժանմունքում: Դեռևս հայտնի չէ` երեխայի մոտ կորոնավիրուս կա, թե ոչ: Բժիշկները սպասում են թեստի պատասխանին: