Այս տարվա և ամբողջ քառամյա ընտրական ցիկլի մարտահրավերը կլինի այն, թե ինչպես պատրաստել երկիրը իր պատմական նպատակի, պատմական երազանքի իրականացմանը, այն է` հնարավոր դարձնել ԵՄ լիիրավ անդամության համար հայտ ներկայացնելը:  Այս մասին հայտարարել է Վրաստանի վարչապետի թեկնածու Գիորգի Գախարիան` ելույթ ունենալով Վրաստանի դիվանագիտական ներկայացուցչությունների ղեկավարների՝ «2020-ի դեսպանների համաժողով. Վրաստանի արտաքին քաղաքականության առաջնահերթությունները համաշխարհային համաճարակի համատեքստում, նոր մարտահրավերներ և հնարավորություններ» խորագրով ամենամյա առցանց հանդիպմանը, գրում է kvira.ge կայքը: Վրաստանի կառավարության ղեկավարը նշել է, որ դա հավակնոտ ծրագիր  է, սակայն դա միաժամանակ նպատակ է,  հանուն որի իրենք ամեն օր պետք է աշխատեն: «Սա հավակնոտ ծրագիր է, բայց մենք բոլորս պետք է հասկանանք, որ այն ձեռքբերումներից հետո, որոնց երկիրը հասել է վերջին տարիների ընթացքում, դա քայլ է, որին սպասում է մեր յուրաքանչյուր քաղաքացի, դա նպատակ է, հանուն որի մենք պետք է աշխատենք ամեն օր: Հետևաբար, 2021 թվականի ձեր աշխատանքային ծրագրում երկրի եվրոպական և եվրաատլանտյան ինտեգրումը և եվրոպական և եվրաատլանտյան ինտեգրման հետագա խորացումը համարը մեկ առաջնահերթություն կլինի: Մենք բոլորս պետք է հասկանանք, որ Վրաստանը Եվրոպային մերձեցնելը բոլոր հարթություններում, ներառյալ ֆիզիկական հարթությունը, մեր հիմնական նպատակն է բոլոր ուղղություններով: Տնտեսություն, բիզնես, մշակույթ, կրթություն, մենք պետք է ամեն ինչ անենք, որ առաջիկա չորս տարիներին մեր երկիրը պատրաստ լինի, մենք պետք է ավելի ու ավելի մոտենանք ստանդարտներին, և դա պետք է լինի մեր հիմնական նպատակը»,-հայտարարել է Գախարիան: Հիշեցնենք, որ Գիորգի Գախարիան երկրում տեղի ունեցած խորհրդարանական ընտրություններից հետո կրկին առաջադրվել է Վրաստանի վարչապետի պաշտոնում: