Մարոկկոյի իշխանությունները երկուշաբթի ճնշել են երկրի մայրաքաղաք Ռաբաթում Իսրայելի հետ հարաբերությունների կարգավորման մասին կնքված համաձայնագրից հետո թագավորության քայլերի դեմ բողոքի ակցիան, գրում է Reuters-ը։ Նշվում է, որ ոստիկանական ուժերը կանգնեցրել են դեպի խորհրդարանական հրապարակ տանող գլխավոր փողոցով ընթացող ցույցի մասնակիցներին․ նշվում է, որ հրապարակում  պաղեստինյան իրավունքների պաշտպանության մի խումբ կազմակերպություններ ծրագրում էին նստացույց իրականացնել՝ Իսրայելից պահանջելով վերջ դնել պաղեստինյան հողերի օկուպացմանը։ Գործակալությունը նշում է, որ ոստիկանությունը թույլ չի տվել ցուցարարներին գնալ հրապարակ։ Ավելի ուշ Մարոկկոյի վեց կազմակերպությունները համատեղ հայտարարություն են հրապարակել, որում իշխանությունների քայլը «իրադարձությունների վտանգավոր զարգացում» են որակել։ Ավելի վաղ ԱՄՆ նախագահ Դոնալդ Թրամփը հայտնել էր, որ Մարոկկոն և Իսրայելը պայմանավորվել են կարգավորել իրենց հարաբերությունները՝ ամերիկյան միջնորդությունից հետո: Ինչպես նաև ասել էր, որ ստորագրել է Արևմտյան Սահարայի նկատմամբ Մարոկկայի ինքնիշխանությունը ճանաչող հռչակագիր: Իսրայելի վարչապետ Բենյամին Նեթանյահուն Մարոկկոյի հետ հարաբերությունների կարգավորումը «պատմական խաղաղությանն» ուղղված քայլ էր որակել։ Մարոկկոյի թագավոր Մուհամմեդ 6-րդն, իր հերթին, հայտարարել էր, որ Իսրայելի հետ պաշտոնական երկկողմ կապերը և դիվանագիտական հարաբերությունները պետք է «հնարավորինս շուտ» հաստատվեն։ Նշենք, որ օգոստոսից ի վեր Մարոկկոն դարձել է 4-րդ արաբեկան երկիրը՝ ԱՄԷ-ից, Բահրեյնից և Սուդանից հետո, որը դիվանագիտական հարաբերություններ է հաստատել Իսրայելի հետ: