ԵԱՀԿ ՄԽ համանախագահների վերջին այցը ՀՀԿ փոխնախագահ Արմեն Աշոտյանի համար դատարկ փամփուշտով կրակոց է։ «Ակնհայտ է, որ այսուհետ Ռուսաստանն է որոշելու. խաղացնի Մինսկի խմբին, թե չխաղացնի, կամ ինչ չափով խաղացնի։ Ռուսաստանն Արցախյան խնդրի կարգավորման փաստացի երկու խաղադաշտ է ստացել և դաշտի ընտրությունը կկատարի ըստ գլոբալ աշխարհաքաղաքան խաղի լոկալ դրսևորումների։ «Արևմուտք թե Թուրքիա» տարբերակների մեջ մեզ ակնհայտորեն ձեռնտու է առաջինը, շատ հասկանալի պատճառներով», - նշել է Աշոտյանը։ Ըստ ՀՀԿ փոխնախագահի՝ պատերազմի ընթացքում Արևմուտքի գործած բազմաթիվ սխալները և չգործած բազմաթիվ քայլերը կտրուկ նվազեցրել են իր ներկայության հիմնավորումը տարածաշրջանում։ «Արևմուտքն ինքն է մեղավոր ստեղծված իրավիճակի համար։ Սակայն անգամ այս մեխանիկան է երկրորդական, մինչև մենք չունենանք Մոսկվայի հետ լիարժեք, անկեղծ և վստահելի աշխատող նոր իշխանություն», - ընդգծել է նա։ Արմեն Աշոտյանի դիտարկմամբ՝ Հայաստանն այս պահին Արցախի անվտանգության երաշխավորը չէ։ «Իր անվտանգության հարցով էլ այս դավադիր ոհմակի շուրթերով հղումներ է անում ոչ թե ուժեղ բանակի, այլ միջազգային նորմերի վրա, որոնք, ի դեպ, գնալով ավելի քիչ են աշխատում այսօրվա աշխարհում։ Այս իշխանության հեռացման հարցը ոչ միայն կապիտուլյացիոն ակտի և դավադրությունների «հաշիվը փակելու» խնդիր է, այլ իրականում Հայաստանի և Արցախից մնացած հատվածի անվտանգության հարց», - նշել է Աշոտյանը։