2003-ից 2018-ը Սահմանադրական դատարանի նախկին անդամ Կիմ Բալայանը հացադուլ է հայտարարել։ «Պահանջում եմ քրեական պատասխանատվության ենթարկել Նիկոլ Փաշինյանին՝ երկրի սահմանադրական կարգը տապալելու համար», - irakanum.am-ին ասաց Կիմ Բալայանը՝ նշելով, որ այսօրվանից հացադուլով միացել է ՀՅԴ-ական Գեղամ Մանուկյանին։ Բալայանի խոսքով՝ ինքն իր ամբողջ կյանքում առաջնորդվել է զուտ օրինապահությամբ։ «Եվ իրավական ուղին է ճիշտ ուղին հարցին լուծում տալու համար։ Սա ամենաօրինական և իրավաչափ պահանջն է, որ ես ներկայացնում եմ», - ասաց Կիմ Բալայանը։ Հարցին, թե անժամկե՞տ է հացադուլը, Բալայանը պատասխանեց. «Ո՛չ, մինչև իր հրաժարականը՝ քրեական պատասխանատվության ենթարկելով։ Համոզված եմ, որ դա տեղի կունենա, որովհետև իր համար բավական ապահով վայր է քննչական մեկուսարանը»։ Դիտարկմանը, թե ազատությունն ավելի ապահով չէ՞, Կիմ Բալայանը պատասխանեց. «Այնտեղ ավելի ապահով է»։