Կիևը և Մոսկվան հաստատել են Սպիտակ տան տեղեկությունը, որ ԱՄՆ առաջին տիկին Մելանյա Թրամփի միջնորդությամբ հաջողվել է հրադադարի հասնել Խերսոնի մարզի Օլեշկի քաղաքում, որտեղ վերջին շրջանում հումանիտար ծանր իրավիճակ էր ստեղծվել:

Չդադարող հարվածների հետևանքով անհնար էր դարձել սնունդ և հումանիտար այլ աջակցություն հասցնել քաղաք, ինչպես նաև ապահովել բնակիչների տարհանումը:

Ռուսաստանի զինված ուժերի գլխավոր շտաբի պետ Վալերի Գերասիմովը հայտարարել է, որ ռուսական կողմը հոկտեմբերի 27-ի վաղ առավոտից հումանիտար նկատառումներով կդադարեցնի կրակը Խերսոնի ուղղությամբ, կսահմանվի լռության ռեժիմ:

Ուկրաինայի Գերագույն ռադայի մարդու իրավունքների հարցերով պատասխանատու Դմիտրո Լուբինեցը ևս հաստատել է, որ Օլեշկի հումանիտար աջակցություն հասցնելու շուրջ պայմանավորվածություն են ձեռք բերել։ Նրա խոսքով՝ գործողությունն իրականացվելու է աստիճանաբար, քանի որ դրա իրագործումը չափազանց բարդ է։