Մոտ 30 րոպե Նիկոլ Փաշինյանն ու մյուս ցուցարարները փակել էին Նոր Նորքի առաջին զանգվածի կենտրոնական փողոցը՝ Գայի արձանի հարակից տարածքում: Ապա նրանց մոտեցավ Երևանի փոխոստիկանապետ Վալերի Օսիպյանը՝ պահանջելով դադարեցնել քայլերթը: Մինչև պատգամավորն ու Օսիպյանը քննարկում էին, այդ ընթացքում մի քանի երիտասարդներ դեղին վարդեր բերեցին ու բաժանեցին քայլերթի մասնակիցներին: Աշոտ անունով երիտասարդն, ով վարդեր էր բաժանում,  ասաց, որ շուրջ 250 վարդ է գնել, իսկ դեղին, քանի որ դա հեղափոխության խորհրդանիշ , իսկ վարդը՝ խաղաղության: Ապա Փաշինյանը հայտնեց, որ շարժվում են դեպի Ավան, ինչպես նախապես ծրագրավորել  են, նրանք շենքերի արանքով շարունակեցին ճանապարհը, ապա կանգնեցին, որպեսզի Փաշինյանը նորից քննարկում անի Օսիպյանի հետ: Ակցիայի մասնակիցները ձեռքերով ծափ են տալիս: