Վրաստանում պլանավորվում է պաշտպանության ուժերի բոլոր կանոնավոր ստորաբաժանումները զինել Մ-4 ինքնաձիգներով։ Այս մասին հայտարարել է Վրաստանի պաշտպանության նախարար Իրակլի Ղարիբաշվիլին: Խորհրդարանում «նախարարական ժամ» լսումների շրջանակներում նա ուշադրություն է հրավիրել ՊՆ ուժերի արդիականացման գործընթացի վրա`նշելով, որ արդեն իսկ իրականացվել են բարեփոխումներ և ձեռնարկվել են արդյունավետ քայլեր: «Նշանակալի նորամուծություններից մեկը, որը շուտով կդառնա իրականություն, վերաբերում է պաշտպանության ուժերի բոլոր կանոնավոր ստորաբաժանումները M-4 ինքնաձիգերով զինելուն: Բացի այդ, մարտական ​​ստորաբաժանումները հավելյալ զինված կլինեն ՆԱՏՕ-ի չափորոշիչներին համապատասխանող ժամանակակից զենքերով: Այս գնումը հնարավոր է դարձել 2006-2007 թվականներին Իրաքում խաղաղության վերականգնման և պահպանման գործողությունների ժամանակ ԱՄՆ կառավարության կողմից Վրաստանին հատկացված, սակայն չիրացված գումարների շնորհիվ, որոնք կազմում են մոտավորապես 22 միլիոն դոլար», – ասել է Ղարիբաշվիլին: