ՌԴ-ն ելնում է նրանից, որ Լեռնային Ղարաբաղի վերջնական կարգավիճակը պետք է որոշվի Ադրբեջանի եւ Հայաստանի միջեւ բանակցությունների միջոցով: Օգոստոսի 9-ին «Իմաստների տարածք» համաժողովում ճեպազրույցի ընթացքում այս մասին ասել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան:
«Մենք գոհունակությամբ նշում ենք, որ Հայաստանի եւ Ադրբեջանի միջեւ շփման գծում այսօր հարաբերական անդորր է նկատվում: Դրա հետ մեկտեղ մեզ մտահոգում է այն, որ կողմերը տարբեր պատրվակներով շարունակում են փոխադարձ մեղադրանքներ ներկայացնել: Նման հռետորաբանությունը չի համապատասխանում բանակցային գործընթացի համար բարենպաստ պայմանների ձեւավորման շահերին եւ, բնականաբար, հակամարտության կարգավորման փոխզիջումային տարբերակների որոնմանը», - նշել է Զախարովան:
Նրա խոսքով՝ ՌԴ-ն ելնում է նրանից, որ Լեռնային Ղարաբաղի վերջնական կարգավիճակը պետք է որոշվի Ադրբեջանի եւ Հայաստանի միջեւ բանակցությունների միջոցով:
«Դուք գիտեք մեր դիրքորոշումը: Այն չի փոխվել: Մենք, որպես ԵԱՀԿ ՄԽ համանախագահի եւ հաշվի առնելով Բաքվի եւ Երեւանի հետ Մոսկվայի սերտ կապերը, շարունակում ենք հանձնառու լինել գործընթացի բազմակողմանի առաջընթացի համար աջակցության ցուցաբերմանը»,- հավելել է նա:
00:00:00
