Այսօր Կառավարության նիստից հետո՝ լրագրողների հետ ճեպազրույցի ընթացքում անվտանգության խորհրդի քարտուղար Արմեն Գրիգորյանն անդրադարձավ Արցախի Սահմանադրությունը փոխելուն վերաբերող՝ Սամվել Բաբայանի նախաձեռնությանը"
«Ընդհանրապես, կարծում եմ՝ քաղաքական նպատակներով Սահմանադրությունը չպետք է փոխվի», - ասաց ԱԽ քարտուղարը՝ վստահեցնելով՝ ինքն իր ողջ կյանքում պայքարել է քաղաքական նպատակով սահմանադրական փոփոխությունների դեմ։
«Եվ կյանքում որևէ նպատակի համար երբևիցե չեմ աջակցի ու նախաձեռնի սահմանադրական փոփոխություններ», - հավելեց ԱԽ քարտուղար Արմեն Գրիգորյանը։
Լրագրողների դիտարկմանը, թե Հայաստանում իշխանությունները նախաձեռնում են սահմանադրական փոփոխություններ և այդ նպատակով 2020 թվականին աշխատանքային խումբ է ձևավորվելու և հետաքրքրվեց՝ ի՞նչ նպատակով է դա արվելու։
«Հայաստանի արդարադատության ոլորտում կան խնդիրներ, որոնք լուծելու համար պահանջվում են նաև Սահմանադրական փոփոխություններ։ Այդ փոփոխությունների նպատակը արդարադատության համակարգում արդյունավետություն և բարձր մակարդակով աշխատանք ապահովելն է», - ի պատասխան ասաց Գրիգորյանը։
