ՀՀ զինված ուժերում պայմանագրային զինծառայողների աշխատավարձերի բարձրացումից հետո հայտերի քանակն ավելացել է:
Լրագրողների հետ ճեպազրույցում այս մասին ասաց ՀՀ պաշտպանության փոխնախարար Գաբրիել Բալայանը:
«Պայմանագրային զինծառայողների մոտ հետաքրքրության աճ է նկատվում, ինչը գուցե, կապված է նրանց աշխատավարձերի բարձրացման հետ: Այս ամենի հետ մեկտեղ գոյություն ունեն որոշակի չափորոշիչներ, որոնց պայմանագրային ծառայության անցնել ցանկացողը պետք է համապատասխանի»,- նշեց Բալայանը և հավելեց, որ հիմնականում այդ չափորոշիչները վերաբերում են առողջական խնդիրներին:
Նրա խոսքով՝ սահմանամերձ շրջաններում ծառայել ցանկացողների թիվն ավելի շատ է, քան չցանկացողների։
Անդրադառնալով սահմանին լիովին պայմանագրային ծառայությանն անցնելու հարցին՝ Բալայանն ընդգծեց, որ հարցը դեռ չի քննարկվում: Նրա պնդմամբ՝ քանի դեռ ԶՈւ-ն է պետական սահմանի պահպանությունն իրականացնում, այլ ոչ սահմանապահ զորքերը՝ այդ քայլին հնարավոր չէ գնալ:
