ՀՀ քննչական կոմիտեի ԵՔՔՎ Կենտրոն և Նորք-Մարաշ վարչական շրջանների քննչական քննչական բաժնում ձեռնարկված անհրաժեշտ քննչական գործողությունների արդյունքում պարզվել են ավազակային հարձակման դեպքի հանգամանքները. երկու անձի մեղադրանք է առաջադրվել: Այս մասին NEWS.am-ը տեղեկանում է ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից։ 2019 թվականի փետրվարի 06-ին՝ ժամը 13:10-ին, Երևան քաղաքի՝ 1958թ. ծնված բնակչից հաղորդում է ստացվել այն մասին, որ 2019 թվականի փետրվարի 03-ին՝ ժամը 23:30-ից մինչև ժամը 24:00-ն ընկած ժամանակահատվածում, Երվանդ Քոչար փողոցում անհայտ անձինք, ավտոմեքենայով փոխադրելու հարցի շուրջ առաջացած վիճաբանության ժամանակ, հարվածներ են հասցրել իր դեմքին` պատճառելով մարմնական վնասվածք: Դեպքի առթիվ 2019թ. փետրվարի 15-ին Ոստիկանությունում հարուցվել է քրեական գործ՝ ՀՀ քրեական օրենսգրքի 113-րդ հոդվածի 2-րդ մասի 3-րդ և 6-րդ կետերով, որի նախաքննությունը կատարվում է ԵՔՔՎ Կենտրոն և Նորք-Մարաշ վարչական շրջանների քննչական քննչական բաժնում: 60-ամյա տղամարդը ճանաչվել է տուժող և հարցաքննվել դեպքի շուրջ: Կատարվել են անհրաժեշտ քննչական գործողություններ՝ անձի ճանաչման քննչական գործողություն, նշանակվել են մի շարք փորձաքննություններ, հարցաքննվել վկաներ: Քրեական գործով ձեռնարկված միջոցառումների արդյունքում տվյալներ են ձեռք բերվել ենթադրյալ հանցագործություն կատարած անձանց ինքնության վերաբերյալ, որոնք Երևան քաղաքի բնակիչներ են՝ ծնված 1984 և 1973թթ.: Նախնական քննությամբ պարզվել է, որ վերջիններս, ուրիշի գույքի հափշտակություն կատարելու շուրջ նախնական համաձայնության գալով, 2019 թվականի փետրվարի 04-ին` ժամը 00:30-ի սահմաններում, Երևան քաղաքի Երվանդ Քոչար փողոցում վիճաբանություն են նախաձեռնել իրենց տաքսի ծառայություն մատուցող 1958թ. ծնված քաղաքացու հետ: Իրենց մտադրությունն ի կատար ածելու համար, հափշտակության նպատակով, հարձակում են գործել տաքսի ավտոմեքենայի վարորդի վրա և որպես զենք օգտագործվող առարկայի` դանակի գործադրմամբ վերջինիս առողջության համար վտանգավոր բռնություն գործադրելու սպառնալիքով գումար տալու պահանջ ներկայացրել նրան, հարվածներ հասցրել՝ պատճառելով դեմքի փափուկ հյուսվածքների սալջարդի, սալջարդ վերքերի, ներծոցային արյունահավաքի գանգուղեղային վնասվածքի, քթոսկրերի, աջից` վերին ծնոտի, ձախից` այտոսկրի կոտրվածքների ձևով միջին ծանրության վնասվածքներ՝ առողջության տևական քայքայումով: Նախաքննության ընթացքում նշանակված դատաբժշկական փորձաքննության եզրակացությունն ստացվել է: Ձեռք բերված բավարար ապացույցների հիման վրա՝ 1984 և 1973թթ. ծնված տղամարդկանց մեղադրանք է առաջադրվել՝ ՀՀ քրեական օրենսգրքի 175-րդ հոդվածի 2-րդ մասի 1-ին և 4-րդ կետերով: Նախաքննությունը շարունակվում է: Ձեռնարկվում են անհետաձգելի քննչական և դատավարական այլ միջոցառումներ՝ դեպքի բոլոր հանգամանքները պարզելու, օբյեկտիվ, լրիվ և բազմակողմանի քննությունն ապահովելու ուղղությամբ: