ՀՀ քննչական կոմիտեի Աջափնյակ եւ Դավթաշեն վարչական շրջանների քննչական բաժնում ձեռնարկված քննչական գործողությունների արդյունքում բացահայտվել է 34-ամյա տղամարդու դանակահարության դեպքը: Մեկ անձ ձերբակալվել է: 2019 թվականի մարտի 24-ին «Արմենիա» ՀԲԿ-ից ՀՀ ոստիկանության ԵՔՎ Մաշտոցի բաժին հաղորդում է ստացվել այն մասին, որ «Ձախ նախադաստակի ստորին երրորդի արտաքին մակերեսի, անոթափոսի առաջնային մակերեսի եւ կրծքավանդակի ձախ կեսի միջին անրակային ձեւով 4-րդ միջկողային տարածությունում կտրած-ծակած մոտ 15 սմ. երկարությամբ դեպի որովայնի  խոռոչ թափանցող վերքեր» ախտորոշմամբ բուժօգնության է տեղափոխվել Երեւանի բնակիչը՝ ծնված 1984թ., ով հայտնել է, որ մարմնական վնասվածքը ստացել է վայր ընկնելու հետեւանքով: Ձեռնարկված միջոցառումների արդյունքում պարզվել է, որ 34-ամյա տղամարդը նշված մարմնական վնասվածքը ստացել է նույն օրը՝ ժամը 17:30-ի սահմաններում, Երեւան քաղաքի  Հրազդանի կիրճում՝ Կիեւյան կամրջի տակ՝ Երեւանի մեկ այլ՝ 1978թ. ծնված բնակչի հետ տեղի ունեցած վիճաբանության ժամանակ: Դեպքի առթիվ 2019 թվականի մարտի 25-ին ՀՀ ոստիկանության Երեւան քաղաքի վարչության Մաշտոցի բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասի հատկանիշներով, որով նախաքննությունն իրականացվում է  ՀՀ ՔԿ Աջափնյակ եւ Դավթաշեն վարչական շրջանների քննչական բաժնում: Քննությամբ ձեռք բերված տվյալների համաձայն՝ 2019 թվականի մարտի 24-ին՝ ժամը 17:30-ի սահմաններում, ավտոմեքենայի սրահում գումարային հարցերի շուրջ առաջացած վիճաբանության ժամանակ ենթադրյալ հանցագործություն կատարած անձը դանակով հարվածել է իր կողքի նստատեղին նստած 34-ամյա տղամարդուն: Երեւանի 41-ամյա բնակիչը ձերբակալվել է՝ 34-ամյա տղամարդուն ծանր մարմնական վնաս պատճառելու կասկածանքով: Նախաքննությունը շարունակվում է: